Олий таълим, фан ва инновациялар вазирлиги делегациясининг Хитойга ташрифи давомида бир қатор келишувларга эришилди.
Вазирлик матбуот хизматининг маълум қилишича, Хитойнинг Шинжон-Уйғур автоном районига 28—30 апрель кунлари амалга оширган хизмат сафари давомида икки томонлама алоқаларни янада кенгайтириш, ўзаро манфаатли инвестиция лойиҳаларини муҳокама қилиш ҳамда минтақавий ҳамкорликни ривожлантириш мақсадида бир қатор ташкилотлар билан ҳамкорлик учрашувлари ташкил этилди.
БМТнинг Савдо-сотиқ ва ривожланиш комиссияси эксперти ва Space Techtronic Industries Services (Шензҳен) Cо., Ltd. вакиллари билан технологияларни Хитойдан Ўзбекистонга трансфер қилиш жараёнларини мувофиқлаштирувчи махсус марказ ташкил этишга келишилди.
Хитойнинг Xinjiang Beixin Road & Bridge Group Cо., Ltd. компанияси билан академик алмашинув дастурларини ташкиллаштиришга келишилди.
Тянфен Синсзян қишлоқ хўжалиги илмий-техникавий компанияси билан озиқ-овқат хавфсизлигини таъминлаш учун мўлжалланган лаборатория маркази очилишига келишиб олинди ва битим имзоланди. Тянсзин қишлоқ хўжалиги университети билан ҳамкорликда аграр соҳадаги илмий тадқиқотлар ўтказиладиган марказ ташкил этиш ва “Янги Ўзбек—Хитой ландшафт дизайни” концепциясини яратиш ва бу йўналишда ҳамкорликни янада чуқурлаштириш юзасидан келишувга эришилди.
Хитойнинг Чанъан университети ўртасида талабалар алмашинуви ва халқаро ҳамкорликни ривожлантириш бўйича музокаралар ҳам бўлиб ўтди. Тошкент кимё-технология институти Янгиер филиали ҳамда Хитойнинг Чанъан университети ўртасида талабалар алмашинуви ва халқаро ҳамкорликни ривожлантириш бўйича музокаралар ўтказилди. Хитой томонидан таклиф этилган дастурга кўра, 4 та бакалавриат йўналиши бўйича ҳар бир йўналишга 30 нафаргача талабани қабул қилиш режалаштирилган.
Бундан ташқари, Пекин технология институтининг Тошкент шаҳридаги филиалини очиш масаласи муҳокама қилинди. Янги хорижий кампус таркибида бешта асосий факультет фаолият юритади: компьютер фанлари, машинасозлик ва автомобилсозлик, “яшил” энергетика, катта маълумотлар (Big Data), сунъий интеллект ва киберхавфсизлик.
2024 йил январида Ўзбекистон ва Хитой ОТМлари ўртасида 70 та ҳужжат имзоланганди. Жами 5 та ОТМ ўртасида қўшма таълим дастурларини ташкил этиш бўйича келишувларга эришилди.
2025 йилинг март ойида Хитойнинг JC Finance Interconnect Holdings компанияси вакиллари билан Ўзбекистонда “яшил” энергетика, қишлоқ хўжалиги, АКТ, туризм каби соҳа мутахассислари учун илғор халқаро стандартлар асосида қайта тайёрлаш ва малакани ошириш дастурларини ишлаб чиқиш масалалари муҳокама қилинганди. Ўзбекистон фуқароларини таълим ва касбий фаолиятга тайёрлаш бўйича хизматлар кўрсатиш марказини очиш юзасидан тегишли вазирлик ва идораларда учрашувлар ўтказилиши режалаштирилган.
Изоҳ (0)