Пекин шаҳрида Ўзбекистон Олий таълим, фан ва инновациялар вазирлиги ҳамда Хитой Таълим вазирлиги томонидан Ўзбекистон–Хитой таълим форуми ўтказилди. Бу ҳақда Ўзбекистон Олий таълим, фан ва инновациялар вазирлиги “Дарё”га маълум қилди.
Форумда Ўзбекистон томонидан 37 та, Хитой томонидан 110 та етакчи олий таълим муассасалари (ОТМ) ректорлари иштирок этди.
Тадбир доирасида Ўзбекистон—Хитой ОТМлари раҳбарлари иштирокида аниқ ва гуманитар фанлар, муҳандислик, қишлоқ хўжалиги, ахборот технологиялари, тиббиёт ва фармацевтикага оид панел сессиялари бўлиб ўтди ва қатор ҳамкорлик келишувларига эришилди.
Форум давомида икки давлат ОТМлари ўртасида 70 та ҳужжат имзоланди. Жами 5 та ОТМ ўртасида қўшма таълим дастурларини ташкил этиш бўйича келишувларга эришилди.
“Мазкур қўшма таълим дастури асосида 300 дан ортиқ талаба Хитойнинг илғор университетларида таҳсил олиш имкониятига эга бўлади. Шу билан бирга, форум доирасида 100 дан ортиқ Ўзбекистон талабалари учун грант дастурларини ташкил этиш бўйича келишувларга эришилди”, — дейилади вазирлик берган маълумотда.
Шунингдек, форумда Ўзбекистон ва Хитой ОТМлари ҳамкорлиги тўғрисидаги Пекин декларацияси қабул қилинди. Ҳужжатда Хитой ва Ўзбекистон ОТМлари ўртасида институционал платформа яратиш, Хитой–Марказий Осиё таълим ҳамкорлиги моделини шакллантириш, академик алмашинув дастурларини янада ривожлантириш, қўшма тадқиқотлар ва инновацион лойиҳаларни амалга ошириш кўзда тутилган.
Изоҳ (0)