Олий таълим, фан ва инновациялар вазири Иброҳим Абдураҳмонов Хитой Фанлар академияси ҳузуридаги Синьцзян экология ва география институтининг бир гуруҳ олимларини қабул қилди.
Учрашув доирасида Президент ҳузуридаги Оролбўйи халқаро инновация маркази ва Синсзян экология ва география институти ҳамкорлигида 2023–2025 йилларда амалга ошириладиган қиймати 500 минг доллар бўлган “Орол денгизи ҳавзасининг экологик тикланишида фотоэлектр қуёш энергиясидан фойдаланиш тажрибасини қўллаш ва намойиш этиш” инновацион лойиҳасини амалга ошириш истиқболлари муҳокама қилинган.
Лойиҳа доирасида қуёш панеллари остида галофит, чўл ва шўрга чидамли ўсимликларни ўстириш, қуёш панеллари орқали олинган электр энергиядан, жумладан, шўрланган сувларни тозаловчи махсус технологияларни қўллашда фойдаланилиши назарда тутилган. Шу йўсинда чўлланган ҳудудда ҳосил бўладиган яшил қопламалар қум бўронларининг ҳосил бўлишини олдини олишга хизмат қилади.
Иброҳим Абдураҳмонов мазкур лойиҳа ҳамда Синсзян экология ва география институтининг Ўзбекистон илмий-тадқиқот муассасалари билан ҳамкорлиги доирасидаги лойиҳаларни қўллаб-қувватлашга тайёрлигини билдирган. Суҳбат давомида, шунингдек, коронавирус пандемиясидан кейинги даврда мамлакатлар ўртасидаги икки томонлама илмий-техникавий ҳамкорликни фаоллаштириш бўйича ҳам фикр алмашилган.
Шу билан бирга, Сирдарё вилоятида экология, қишлоқ хўжалиги, сув муаммолари, ирригация йўналишлари бўйича Ўзбекистон—Хитой қўшма олий таълим ва илмий-тадқиқот муассасаларини ташкил этиш бўйича дастлабки келишувга эришилган.
Учрашув якунида Хитой томони вазир Иброҳиб Абдураҳмоновни 2023 йил август ойида Урумчи шаҳрида бўлиб ўтадиган халқаро форумда иштирок этиш учун таклиф этган.
Аввалроқ Алпҳа Гакуин институти ва Сурхондарё вилояти ҳокимлиги ўртасида Термиз шаҳрида Ўзбекистон—Япония технологик университетини ташкил этиш бўйича ҳамкорлик меморандуми имзолангани тўғрисида хабар берилганди.
Изоҳ (0)