Tez ovqatlanish restoranlari global tarmog‘i Burger King O‘zbekiston bozoriga kirmoqda. Bu haqda Spot bir nechta manbalariga tayanib xabar berdi.
Nashr ma’lumotlariga ko‘ra, O‘zbekistondagi franshiza Burger King Uzbekistan bo‘lib, uning franchayzeri Moskva bo‘ladi. Hozirda Toshkentda Burgerhouse MChJ kompaniyasi ro‘yxatga olingan, uning ustav fondi 1 milliard so‘mga teng. Shuningdek, xodimlarni ishga olish boshlangan. Kompaniya ushbu ma’lumotlarni “Gazeta.uz”ga ham tasdiqlagan va litsenzion kelishuv bo‘yicha muzokaralar olib borilayotganini ma’lum qilgan.
Kompaniyaning aniqlashtirishicha, Toshkentda birinchi filial 2021-yilning oxirigacha ochilishi rejalashtirilmoqda, lekin pandemiya bunga ta’sir o‘tkazishi mumkin.
Qayd etilishicha, restoranning ma’muriy-boshqaruv personali (direktor va menejerlar) uchun o‘quv mashg‘ulotlari Moskvada bo‘lib o‘tadi. Filiallar qayerda joylashishi bo‘yicha ma’lumot hozircha yopiq.
Burger King allaqachon O‘zbekistonda o‘zining intellektual mulkini himoya qilgan (2014-yilda), lekin 17-may kuni kompaniya yana ikkita tovar belgisini ro‘yxatga olgan. Hozirda ular ko‘rib chiqilmoqda.
Burger King 1954-yilda AQShda tashkil topgan. Gamburgerlarga (asosan vopperlar) ixtisoslashgan tez ovqatlanish restoranlari tarmoqlari orasida dunyoda ikkinchi o‘rinda turadi.
Eslatib o‘tamiz, 2018-yilda jahondagi eng yirik muzqaymoq-kafelar tarmog‘i Baskin-Robbins tez orada O‘zbekiston bozoriga kirib kelishi, “Chorvoq” turistik zonasiga McDonald’s, Starbucks va Burger King’ni taklif etishga qaror qilingani to‘g‘risida xabar berilgandi.
Izoh (0)