Иллинойс университети тадқиқотчилари йўллардаги тирбандликларда узоқ вақт туриб қолиш ва тезпишар таомлар кафесига кўпроқ қатнаш ўртасида боғлиқликни аниқлади. Бу омил ҳар йили миллионлаб аҳоли саломатлигига салбий таъсир кўрсатади.
Лос Анжелес ўтказилган таҳлилий маълумотларга кўра, кутилмаган тирбандликлар оддий тирбандликлар билан солиштирганда тез овқатланиш ресторанларига ташриф буюришни 1% га оширган. Бир қарашда бу кўрсаткич унчалик катта кўринмаслиги мумкин, аммо йирик шаҳарлар миқёсида йилига 1,2 миллион марта қўшимча тарзда фастфуд ейиш ҳақида гап кетмоқда. Тадқиқот муаллифлари ўз хулосаларини нотўғри овқатланиш одатларини камайтириш нуқтаи назаридан муҳим деб ҳисоблашини билдирди.
Олимлар Лос Анжелесдаги икки йиллик йўл ҳаракатлари, трафик ва тирбандлик ҳақидаги маълумотларни ўрганиб чиқди. Шунингдек шу вақт оралиғида уяли телефондан фойдаланадиган нечта киши фастфуд ресторанларига ташриф буюргани ҳақида маълумотларни таҳлил қилди. Натижада бундай муассасаларга ташриф буюришнинг кўпайиши ва тирбандликлар ўртасида бевосита боғлиқлик мавжудлигини ифодалайдиган компьютер моделини ишлаб чиқди.
Кечки соатларда ишдан қайтаётган аҳоли озиқ-овқат дўконларига камроқ ташриф буюради. Улар, эҳтимол, дўконда тўхтаб, уйда кечки овқат пишириш учун масаллиқ сотиб олишдан кўра шунчаки бургер ва қовурилган картошка сотиб олишни маъқул кўради.
Ҳар бир йирик шаҳарда тирбандлик ҳам, тез овқатланиш ресторанлари кўп бўлганлиги сабабли, ушбу тенденция фақатгина Лос Анжелесга хос эмас. Йўл тирбандлиги ва носоғлом овқатланиш ўртасидаги боғлиқлик бутун дунё шаҳарларидаги тирбандликни камайтиришга ҳамда транспорт инфратузилмасини яхшилашга яна бир сабаб бўлади.
Изоҳ (0)