Франциялик тадбиркор Николас Пуeч ўзининг собиқ боғбонини асраб олиш жараёнини бошлади. Hermes модалар уйининг 6 фоизга яқин акцияларига эгалик қилувчи тадбиркор бойлигининг камида ярмини асраб олинган ўғлига қолдирмоқчи. Бу ҳақда CNN хабар берди.
80 ёшли Николас Пуeч барча пуллари ўзи асос солган Isocrates Foundation фондига ўтишини назарда тутувчи васиятини бекор қилмоқчи. Бунинг ўрнига у собиқ боғбонни асраб олмоқчи ва унга 12 миллиард еврога баҳоланган бойлигининг камида ярмини қолдирмоқчи.
Пуeчнинг фарзандлари йўқ. Васиятнома шартларига кўра, агар миллиардер тўсатдан ота бўлмаса, унинг Hermes компаниясидаги барча улуши Isocrates фондига ўтиши керак. Агар тадбиркорнинг фарзанди (қондош ёки асраб олинган) бўлса, у мероснинг бир қисмини талаб қилиши мумкин. Агар у ўғил бўлса, тадбиркорга тегишли бойликнинг ярмини олади.
Isocrates Foundation аллақачон “юридик нуқтаи назардан, васиятноманинг бир томонлама бекор қилиниши ҳақиқий эмас ва асоссиз” эканини таъкидлаган. Фонд ўз таъсисчисининг боғбонни асраб олиш қарорига қарши чиққан. Ташкилот вакиллари Пуeч билан мерос масаласини муҳокама қилишга тайёр эканини билдирган.
Пуeч ўзининг маркали шойи шарфлари ва чарм сумкалари билан машҳур Hermes компаниясининг 5,7 фоизига эгалик қилади. Hermes акцияларининг умумий қиймати ҳозирда тахминан 211 миллиард еврони ташкил этади. Компанияни бошқарадиган Hermes оиласи дунёда бойлиги бўйича учинчи ўринда туради. Николас Пуeч Hermes асосчиси Терри Эрмеснинг бешинчи авлоди.
Изоҳ (0)