“Hotels.cом” меҳмонхоналарни брон қилиш онлайн сервиси ўзининг навбатдаги йиллик ҳисоботини эълон қилди, деб ёзади “Правила жизни” нашри. Унда дунё бўйлаб меҳмонхоналарда энг кўп унутиб қолдириладиган предметлар рўйхати ҳам ўрин олди.
Меҳмонлар асосан телефонни зарядловчи қурилмалар, косметика воситалари, ҳожатхона буюмларини олиб кетишни ёдидан чиқаради. Қизиқарлиси, тасодифан қолдириб кетилган буюмлар орасида қимматбаҳо нарсалар: 6 миллион долларлик Rolex соати ва Hermes Birkin сумкасини ҳам учратиш мумкин.
Бундан ташқари, хорижий сайёҳлар меҳмонхоналарда ғайриоддий предмет ва ҳатто ҳайвонлар: калтакесак, жўжа каби митти дўстларини қолдириб кетишган. Қайд этилишича, уй ҳайвонлари ўз эгаларига албатта топширилган. Меҳмонхоналарда ташлаб кетилган буюмлар орасида қимматбаҳо Ferrari машинасининг калити, протезлар, автомобиль шиналари ва ҳаттоки қурилиш қувурлари ҳам топилган.
Шунингдек, “Hotels.cом” ўз ҳисоботида меҳмонларга хизмат кўрсатиш сервисига келиб тушган ноодатий сўровлар ҳақида ҳам маълумот берди. Ташриф буюрувчилар меҳмонхона ходимларидан ваннани Эвиан суви билан тўлдиришни, уй ҳайвонлари учун индивидуал меню тузишни ва ўз хонасига куйган тост, икрали ҳот-дог ва янги соғилган эчки сутини етказиб беришни сўраган.
Изоҳ (0)