Кенияда минглаб чумолиларни йиғган икки нафар белгиялик ўсмир маҳаллий ҳокимият томонидан контрабанда қилишда гумон қилиниб, ҳибсга олинди. Накуру округида қўлга олинган йигитлардан пробиркаларга жойланган 5 мингта чумоли мусодара қилинган. Бу ҳақда Euronews хабар бермоқда.
Таъкидланишича, 19 ёшли йигитлар Найроби судига олиб келиниб, у ерда чумолиларни кўнгил очиш учун йиғганликларини ва бунинг ноқонунийлиги ҳақида билмаганликларини айтишган. Шу пайтнинг ўзида, худди шу суд залида судья чумолилар билан қўлга олинган Кения ва ветнамлик икки эркакка ҳам айблов эълон қилган.
Кения ёввойи табиат хизмати (КWС) ўз баёнотида бу шахслар Европа ва Осиё бозорлари учун ҳашаротларни ноқонуний сотиш билан шуғулланганини маълум қилди.
“Чумолиларни ноқонуний экспорт қилиш нафақат Кениянинг ўз биологик хилма-хиллигига бўлган суверен ҳуқуқларини бузади, балки маҳаллий ҳамжамиятлар ва илмий-тадқиқот институтларини потенциал экологик ва иқтисодий манфаатлардан маҳрум қилади”, деб таъкидлади КWС.
Илгари Кения фил, каркидон ва панголинлар каби йирик ёввойи ҳайвонлар аъзоларининг ноқонуний савдосига қарши курашган. Бироқ сўнгги тўртта иш “савдо тенденцияларининг ўзгаришини — машҳур йирик сут эмизувчилардан камроқ танилган, аммо экологик жиҳатдан муҳим турларга ўтишини” кўрсатмоқда.
Кения ҳукумати белгияликлардан мусодара қилинган чумолиларни тахминан 7 минг еврога баҳолаган. Шунингдек, улар ҳашаротларнинг нархи, тури ва бозорига қараб сезиларли даражада фарқ қилиши мумкинлигини қўшимча қилган.
Найробидаги Африка ёввойи табиат жамғармасининг табиатни муҳофаза қилиш бўйича вице-президенти Филип Мурутининг айтишича, чумолилар тупроқни бойитишда, уруғларнинг униб чиқишига ёрдам беришда ва қушларга озуқа етказиб беришда муҳим рол ўйнайди.
“Сиз соғлом ўрмонни, масалан, Нгонг ўрмонини кўрганингизда, уни нима соғлом қилаётгани ҳақида ўйламайсиз. У ерда ҳамма нарса ўзаро боғлиқ — бактериялардан чумолиларгача ва ундан ҳам йирикроқ мавжудотларгача”, деди у.
Қўшимча қилинишича, қўлга олинган тўртала шахс ҳам 23 апрелда бўлиб ўтадиган кейинги суд мажлисигача қамоқда қолади.
Изоҳ (0)