ПФЛ Жасур Жалолиддинов трансфери бўйича иш очишни сўраб ЎФАга мурожаат қилди

Ўзбекистон Профессионал футбол лигаси (ПФЛ) футболчи Жасур Жалолиддинов трансфери бўйича иш очишни сўраб Ўзбекистон футбол ассосиациясига (ЎФА) мурожаат қилган. Бу ҳақда ПФЛ директори вазифасини бажарувчи Диёр Имомхўжаев Telegram’даги каналида маълум қилди.

Имомхўжаевнинг таъкидланишича, Жасур Жалолиддиновнинг трансферида бир қанча шубҳалантирган жиҳатлар бор.

Жумладан:

• ТМS’га (ТМS — Трансферларни таққослаш тизими) Жалолиддинов иши бўйича келишув битими эмас, футболчи ва «Бунёдкор» ўртасида шартномани бекор қилиш бўйича битим жойлаштирилган. Яъни футболчи билан шартнома аввал бекор қилиниб, у эркин агентга айлантирилган. Нега?
• Жалолиддинов билан шартнома бекор қилинган бўлса, битим биринчи навбатда ЎзПФЛга тақдим этилиши керак бўлган. Аммо ЎзПФЛ бундан бехабар, «Локомотив» эса ҳужжатни аллақачон қўлга киритган. Нега?
• Давлат активларини бошқариш агентлиги («Бунёдкор»нинг янги ҳомийси) Жалолиддинов трансфери борасида ахборот беришни сўраб, икки марта «Бунёдкор»га мурожаат қилган, аммо иш пишмагунига қадар «Бунёдкор» жавоб хатини пайсалга солган. Нега?
• Жалолиддиновга Туркиядан 400 минг евролик таклиф турганда, нега у эркин агентга айлантирилиб, кейин «Локомотив»га йўналтирилган?

Диёр Имомхўжаевнинг қўшимча қилишича, «Локомотив»нинг ТМS сўровига икки ҳафта ичида жавоб қайтарилмаса, ФИФА ўз-ўзидан футболчи манфаати учун қарор чиқариб беради. Достон Ҳамдамов ишида ҳам шундай бўлган. Кўринишидан, ишни икки ҳафта чўзиб туриш кимгадир керак бўлган. Аммо клубда раҳбарият алмашиши, катта эҳтимол билан ўша режаларни бузган.

Бу борадаги саволлар ўринсиз бўлиб, балки ҳаммаси регламент асосида амалга оширилган, шубҳага ўрин йўқдир... Бироқ энди буни исботлаб бериш керак бўлади. ТМS сўровига жавоб қайтариш учун эса ЎФАда 10 кундан ортиқ вақт бор. Де факто Жалолиддинов «Локомотив» либосини кийиб улгурган бўлса-да, де юре ЎзПФЛ учун футболчи ҳали-ҳамон «Бунёдкор» вакили ҳисобланади. Бунда албатта футболчи ва клуб 2021 йилнинг апрелига қадар давом этиши керак бўлган шартномани бекор қилиб улгурганини ҳам унутмаслик керак. Бу бирламчи ҳужжат ҳисобланади.

Диёр Имомхўжаев, ПФЛ бош директори вазифасини бажарувчи

Эслатиб ўтамиз, аввалроқ Жалолиддинов «Локомотив» клуби билан беш йиллик шартнома имзолагани, Москва клуби эса Жасур трансфери учун 1 миллион евродан ортиқ маблағ сарфлаши ва бу миқдорнинг 100 минг евроси «Бунёдкор»га тегиши ҳақида хабар қилинганди.

Жалолиддинов 2019/20 йилги мавсум Ўзбекистон чемпионатида 8 ўйин ўтказиб, биттадан гол ва голли узатмага муаллифлик қилди.