Zamonaviy ispan futbolining eng yorqin isteʼdod egalaridan biri — Isko nafaqat maydondagi harakatlari, balki shaxsiy hayoti, bolalikdagi orzulari va futboldagi karyerasi bilan ham ko‘plab muxlislarning eʼtiborini qozongan. U bolaligidan futbolga oshno bo‘lgan va o‘z mehnati bilan professional futbolda katta muvaffaqiyatlarga erishgan. Quyidagi maqolada esa siz Iskoning oddiy maydonchadan katta stadionlargacha bo‘lgan yo‘lini, uning orzulari, sevimli futbolchilari va shaxsiy hayotidagi eng muhim voqealardan xabardor bo‘lasiz.
Isko – bolaligidan futbolga oshno bo‘lgan yulduz
Fransisko Roman Alarkon Suares, muxlislari orasida Isko nomi bilan tanilgan futbolchi 1992-yil 21-aprelda Ispaniyaning Malaga shahri yaqinidagi Arroyo de la Miel qishlog‘ida tug‘ilgan. U 1,76 metr bo‘yga ega va vazni 74 kilogramm. Futbolga bo‘lgan mehri yoshligidanoq namoyon bo‘lgan. Otasi sovg‘a qilgan rezina to‘p bilan sportning ushbu turiga mehr qo‘ygan, biroq u otasi sovg‘a qilgan to‘pni yo‘qotib qo‘ygan. Keyinroq Reyes Magos (Reyes Magos — ispan xalqi uchun Qorbobo kabi sovg‘alar olib keladigan shaxs) unga ilk charm to‘pni sovg‘a qiladi.
Maktab yulduzi
Isko maktabdagi tanaffuslar vaqtini do‘stlari bilan futbol o‘ynashga bag‘ishlardi. Tushlikdan keyin uyi yaqinidagi maydonda futbolni davom ettirar va doim yonida o‘zining to‘pi bo‘lardi. Uning isteʼdodi shu yerda sezila boshladi. Avvaliga Retamar futbol maktabiga yozildi, keyin “Atletiko Benamiel” jamoasida debyut qildi. Ushbu jamoa safida turli hududiy musobaqalarda ajoyib o‘yin ko‘rsatib, ko‘plab sovrinlarga ega chiqqan.
Musobaqada qatnashish uchun “hiyla”
O‘sha payt Ispaniyada 7 yoshdan kichik bolalarning turnirlarda qatnashishiga ruxsat yo‘q edi. Isko atigi 5 yosh bo‘lgan. Shunday bo‘lsa-da, murabbiyi bilan birga uning yoshini kattaroq qilib ko‘rsatib, hujjat tayyorlashadi. Natijada u ancha yoshi katta futbolchilar bilan o‘ynab, ular orasida ham ajralib turardi.
Zidan – ilhom manbayi
Isko bolaligidan fransiyalik futbol afsonasi Zinedin Zidanning o‘yiniga qoyil qolardi. Har kuni uning fintlarini, to‘p bilan harakatlarini takrorlashni mashq qilib ko‘rar edi. Bu harakatlar o‘z samarasini berdi – bugungi kunda muxlislar Iskoni “Magic Isco” deb atashadi, bu uning to‘p bilan juda nozik harakat qilishini ko‘rsatadi.
Ronaldinyo va Romarioning taʼsiri
Zidan asosiy kumiri bo‘lsa-da, Isko braziliyalik yulduzlar Romario va Ronaldinyoning ham o‘yin uslubidan ilhom olgan. Romarioning dribblingi, Ronaldinyoning o‘yinidagi harakatlari – bularning barchasi Iskoning o‘yin uslubini shakllantirgan.
Uning uy hayvonlari ismi mashhur futbolchilar nomiga qo‘yilgan
Iskoning mashhur futbolchilarga bo‘lgan muhabbati shunchalik kuchliki, u uy hayvonlariga o‘z kumirlarining ismini qo‘ygan. Masalan, “Real”ga o‘tganidan so‘ng Luish Figoning sharafiga itiga uning ismini qo‘ygan. Hozir o‘zining eng sevimli kuchuklaridan biriga Messi deb nom bergan.
Oila – eng katta tayanch
Iskoning hayotida eng muhim o‘rin tutuvchi insonlari – turmush o‘rtog‘i Viktoria Kalderon va o‘g‘li Fransisko. U o‘g‘lining tug‘ilgan kuni sanasini qo‘liga tatuirovka qilib yozdirgan. Bundan tashqari, unda ayoli va o‘g‘lini ifodalovchi ikki farishta tatuirovkasi ham mavjud.
Bolalikdagi maydon
Isko futbolni juda ham sevadi. U hozir ham har bir o‘yinga xuddi bolalikdagi kabi muhabbat bilan, undan zavq olish uchun maydonga chiqadi. Isko yoshlikda do‘stlari bilan futbol o‘ynagan kunlarini hayotining eng baxtli damlari sifatida eslaydi.
Padel – futbolchining ikkinchi muhabbati
Futboldan tashqari, Isko padel sportiga ham oshno (padel — bu tennisning bir turi). Bo‘sh vaqtlarida do‘stlari bilan raketka olib, padel o‘ynash uchun boradi. Ko‘p harakatli va tezkorligi bilan ajralib turadigan ushbu sport Iskoni o‘ziga rom qilgan. Har holda, padel maydonida futbolchi o‘zining sevimli fintlarini ishlatolmasa-da, bu o‘yindan katta zavq oladi.
Defensa Central ma’lumotlari asosida Jamshidbek Mahmudov tayyorladi.
Izoh (0)