Шавкат Мирзиёев Жиззахдаги автомобиль заводи фаолияти билан танишди (фото)

Шавкат Мирзиёев ADM Jizzakh автомобиль заводи фаолияти билан танишди. Бу ҳақда президент матбуот хизмати хабар берди. 

Олдинлари Жиззах вилояти саноат кўрсаткичлари энг паст бўлган ҳудудлардан бири эди. Бугунги кунда ҳар бир туманга саноат кириб борди. Вилоят саноатини ривожлантиришда Жиззах эркин иқтисодий зонаси катта ўрин тутмоқда. У маҳсулот ишлаб чиқариш бўйича республикада учинчи, экспорт ҳажми бўйича эса олтинчи ўринда туради. Кейинги йилларда унинг фаолияти такомиллаштирилиб, ишлаб чиқаришга қулайлик кенгайтирилди. Бугунги кунда саноат зонасида 33 та лойиҳа амалга оширилиб, 7 минг 670 киши ишламоқда.

Қайд этилишича, ADM Jizzakh масъулияти чекланган жамияти 2021 йилда ташкил этилган. Ўтган уч йилда Kia, Chery ҳамда Haval брендлари остида 23 турдаги 36 мингта автомобиль ишлаб чиқарилган. Ҳозир Ўзбекистон автомобиль бозорининг 17 фоизини шу заводда ишлаб чиқарилган машиналар ташкил қилади. 

Лойиҳа доирасида 234 миллион АҚШ доллари миқдорида маблағлар ўзлаштирилиб, 1 минг 800 та иш ўрни яратилди. Биринчи босқичда йирик узелли йиғув йўлга қўйилган эди. Бир вақтнинг ўзида заводни кенгайтириш бўйича ишлар олиб борилиб, жорий йил март ойида янги бино ва қувватлар ишга туширилди. 
Яъни, юқори технологияларни жалб қилган ҳолда штамплаш, пайвандлаш, бўяш ва йиғишни қамраб олувчи ишлаб чиқариш жараёни ташкил этилди. 

Давлат раҳбари заводдаги ишлаб чиқариш жараёнини атрофлича кўздан кечирди. Корхона юқори технологик ускуналар билан жиҳозланган. Улар Жанубий Корея, Япония ва Германия каби давлатлардан келтирилган. Заводда 30 та робот бор, ишлаб чиқариш жараёни 33 фоиз автоматлаштирилган. Автомобильнинг юриш қисмлари созлиги, статик ва динамик тормоз тизимини текшириш жиҳозлари ўрнатилган.   

Президент заводда маҳаллийлаштириш даражасини ошириш, саноат корхоналари билан кооперацияни кенгайтириш бўйича кўрсатмалар берди. Бу борада ишлар бошланган. 2024-2027 йилларда 348 турдаги бутловчи қисмларни маҳаллийлаштиририш режалаштирилган. Айни пайтда мамлакатдаги 21 та  корхона билан кооперация тизими йўлга қўйилган.

Умуман, корхонада йилига 100 минг дона енгил автомобиль ишлаб чиқариш қуввати яратилади. Натижада келгусида иш ўринлари сони 3 мингга етказилиши кўзда тутилган. Автомобильлар сифатини янада ошириш мақсадида Жанубий Корея, Ҳиндистон, Хитой ва Ветнам давлатларидан малакали мутахассислар жалб этилди. Бу борада хорижий ҳамкорлар билан жорий йилдан бошлаб дастлаб 50 нафар муҳандис Жанубий Корея ҳамда Хитойдаги тадқиқот ҳамда лойиҳалаш марказларида малака оширишга юборилиши белгиланган.

Давлат раҳбари заводда ишлаб чиқариш бошланган янги Kia Sonet автомобилини кўрди.