U-23 Осиё Кубоги. Ўзбекистон йирик ҳисобда ғалаба қозонди ва кейинги босқич масаласини ҳал қилди (видео)

Футбол бўйича U-23 Осиё Кубоги доирасида Ўзбекистон 20 апрель, шанба куни Кувайтга қарши баҳс олиб борди.

Учрашувнинг 32-дақиқасида Алибек Давронов ўнг қанотдан оширилган тўпни боши билан дарвозага аниқ йўллаб, ҳисобни очди. 

Биринчи тайм тўлиқ ўзбекистонлик футболчилар устунлигида ўтди. Улар тўпга эгалик қилиш, рақиб дарвозасига зарба бериш борасида кувайтлик футболчилардан анчагина юқори кўрсаткичларни қайд этди. Аммо биринчи таймда дарвозаларга бошқа гол урилмади. 

Учрашувнинг иккинчи тайми ҳам Ўзбекистон Олимпия терма жамоаси устунлигида бошланди. 50-дақиқада яна бир ўзбекистонлик ҳимоячи Ҳамроалиев Жасур Жалолиддинов узатмасидан кейин зарба бериб, ўзбекистонликларнинг иккинчи голига муаллифлик қилди.

Беш дақиқа ўтиб Ҳожимат Эркинов қарши ҳужумга ўтди ва Жасур Жалолиддиновга тўпни узатиб, қайта қабул қилиб олди. Дарвозага аниқ зарба берган Ҳожимат ўзбекистонлик футболчиларининг учинчи голига муаллифлик қилди. 

Учрашувнинг 71-дақиқасида Абдурауф Бўриевга нисбатан қўполлик сабаб ҳакам кувайтлик футболчини майдондан четлатди. Учрашувнинг 83-дақиқасида тўп кувайтлик футболчининг қўлига тегди. Ҳакам VAR билан маслаҳатлашиб, нуқтани кўрсатди. Пенальтидан зарба берган Холматов ҳисобни 0:4 га етказди.

Учрашувнинг қўшиб берилган дақиқаларида ўзбекистонлик футболчилар яна бир бор пенальти тепиш имкониятига эга чиқди. Ҳусайн Норчаевнинг зарбасини дарвозабон қайтара олди. Аммо 3 дақиқа ўтиб Ҳусайн Норчаев чап қанотдан оширилган тўпни дарвозага йўллаб, ўзбекистонликларнинг бешинчи голига муаллифлик қилди. 

Шу тариқа учрашув Ўзбекистон Олимпия терма жамоасининг йирик ҳисобдаги ғалабаси билан якунланди.

D гуруҳидан ўрин олган яна бир баҳсда Ветнам Малайзияга қарши майдонга тушди. Икки тўп фарқи билан ғалаба қозонган ветнамликлар 6 очкога эга бўлди. Шу тариқа Ўзбекистон ва Ветнам кейинги босқич масаласини ҳал қилди. Учинчи тур ўйини гуруҳ етакчисини аниқлаб беради.