“Уйда ёлғиз” фильмидаги Кевин Маккалистер роли билан дунё бўйлаб танилган актёр Маколей Калкин Sibling Revelry нашрига берган интервьюсида отаси Кристофер билан мураккаб муносабатлари ва 30 йилдан бери у билан гаплашмаслиги сабаблари ҳақида сўзлаб берди.
Актёр болалигидан отаси билан келиша олмаганини тан олди:
Менинг болаликдаги дастлабки хотираларимдан бири бу келажакда болаларимга отам каби муносабатда бўлмаслигим ҳақидаги фикр эди, дейди у.
Бугунги кунга келиб, Маколейнинг ўзи ота бўлганидан кейин, у отасининг ўтмишдаги хатти-ҳаракатларини янада кўпроқ қоралайди:
У бундай муносабатга лойиқ инсон. У тўртта ўғил ва уч нафар қиз фарзанднинг отаси, ҳозир эса тўртта набираси бор. Аммо уларнинг ҳеч бири у билан алоқада бўлишни истамайди, дейди у.
Фото: Yahoo
44 ёшли актёр отаси билан деярли 30 йилдан бери гаплашмаслигини тасдиқлади. Унинг фикрича, ота ҳанузгача ўз хатоларини англамаган ва тан олмайди ҳам. Калкин 90 йилларда бўлиб ўтган васийлик бўйича суд жараёнларида ҳам отаси билан кўришишдан бош тортганини яхши эслайди:
Мен адвокатимга бу одам билан ҳеч қандай алоқам йўқ ва бўлмаслиги ҳам лозим эканлигини айтган эдим, дея эслайди Калкин.
2016 йилда Кристофер Калкин Daily Mail нашрига берган интервьюсида:
Мен уни энди ўғлим деб ҳисобламайман, деган эди.
Фото: Daily Mail
Маколей эса болалиги ҳақида гапирар экан, отасининг “Уйда ёлғиз” фильми муваффақиятидан кейин унинг карьерасини бутунлай назорат қилганини ва гонорар ҳақидаги маълумотларни ўғлидан доим яширганини айтди.
У мендан газеталарни беркитиб қўяр эди, чунки мен лойиҳа ҳақида ўқиб, қанча миқдорда гонорар олаётганимни билишимни истамас эди, деган эди актёр York Magazine нашри билан суҳбатда (2021).
Маълумот учун, Маколей Калкин Бродвей актёри Кристофер Калкин ва Патрисия Брентрап оиласида туғилган. У оиланинг учинчи фарзанди бўлиб, тўрт ака-ука ва уч опа-синглиси бор. Улардан иккитаси ҳаётдан кўз юмган.
Маколей Калкин актриса Бренда Сонг билан турмуш қурган. 2021 йилда жуфтликнинг биринчи фарзанди туғилган бўлиб, унга актёрнинг автоҳалокат қурбони бўлган синглиси шарафига Дакота Сонг Калкин деб исм қўйилган. 2022 йилда уларнинг иккинчи фарзанди Карсон дунёга келган. 2023 йил 1 декабрда Калкин Голливуддаги Шон-шараф хиёбонида ўз юлдузига эга бўлди.
Изоҳ (0)