“Uyda yolg‘iz” filmidagi Kevin Makkalister roli bilan dunyo bo‘ylab tanilgan aktyor Makoley Kalkin Sibling Revelry nashriga bergan intervyusida otasi Kristofer bilan murakkab munosabatlari va 30 yildan beri u bilan gaplashmasligi sabablari haqida so‘zlab berdi.

Aktyor bolaligidan otasi bilan kelisha olmaganini tan oldi:
Mening bolalikdagi dastlabki xotiralarimdan biri bu kelajakda bolalarimga otam kabi munosabatda bo‘lmasligim haqidagi fikr edi, deydi u.
Bugungi kunga kelib, Makoleyning o‘zi ota bo‘lganidan keyin, u otasining o‘tmishdagi xatti-harakatlarini yanada ko‘proq qoralaydi:
U bunday munosabatga loyiq inson. U to‘rtta o‘g‘il va uch nafar qiz farzandning otasi, hozir esa to‘rtta nabirasi bor. Ammo ularning hech biri u bilan aloqada bo‘lishni istamaydi, deydi u.

Foto: Yahoo
44 yoshli aktyor otasi bilan deyarli 30 yildan beri gaplashmasligini tasdiqladi. Uning fikricha, ota hanuzgacha o‘z xatolarini anglamagan va tan olmaydi ham. Kalkin 90-yillarda bo‘lib o‘tgan vasiylik bo‘yicha sud jarayonlarida ham otasi bilan ko‘rishishdan bosh tortganini yaxshi eslaydi:
Men advokatimga bu odam bilan hech qanday aloqam yo‘q va bo‘lmasligi ham lozim ekanligini aytgan edim, deya eslaydi Kalkin.
2016-yilda Kristofer Kalkin Daily Mail nashriga bergan intervyusida:
Men uni endi o‘g‘lim deb hisoblamayman, degan edi.

Foto: Daily Mail
Makoley esa bolaligi haqida gapirar ekan, otasining “Uyda yolg‘iz” filmi muvaffaqiyatidan keyin uning karyerasini butunlay nazorat qilganini va gonorar haqidagi ma’lumotlarni o‘g‘lidan doim yashirganini aytdi.
U mendan gazetalarni berkitib qo‘yar edi, chunki men loyiha haqida o‘qib, qancha miqdorda gonorar olayotganimni bilishimni istamas edi, degan edi aktyor York Magazine nashri bilan suhbatda (2021).
Ma’lumot uchun, Makoley Kalkin Brodvey aktyori Kristofer Kalkin va Patrisiya Brentrap oilasida tug‘ilgan. U oilaning uchinchi farzandi bo‘lib, to‘rt aka-uka va uch opa-singlisi bor. Ulardan ikkitasi hayotdan ko‘z yumgan.

Makoley Kalkin aktrisa Brenda Song bilan turmush qurgan. 2021-yilda juftlikning birinchi farzandi tug‘ilgan bo‘lib, unga aktyorning avtohalokat qurboni bo‘lgan singlisi sharafiga Dakota Song Kalkin deb ism qo‘yilgan. 2022-yilda ularning ikkinchi farzandi Karson dunyoga kelgan. 2023-yil 1-dekabrda Kalkin Gollivuddagi Shon-sharaf xiyobonida o‘z yulduziga ega bo‘ldi.
Izoh (0)