“Ўзбекистон темир йўллари” Hyundai Rotem тезюрар поезди дизайн лойиҳаси бўйича танлов эълон қилди.
Компания барча истеъдодли дизайнерларни поезднинг ўзига хос ва жозибали ташқи кўринишини яратишга таклиф қилди.
Танлов ғолиби 100 миллион сўм миқдоридаги мукофотга эга бўлади. Поездда ғолибнинг бош ҳарфлари ҳам тасвирланади.
Танлов шартлари:
- иккитадан ортиқ бўлмаган дизайн вариантини тақдим этиш;
- ишларни dizayn-nsr@uzrailway.uz электрон манзилига 2024 йилнинг 12 майигача юбориш;
- мавзу сатрида “Hyundai Rotem поезд дизайни танлови” деб кўрсатиш;
- алоқа маълумотларини кўрсатиш (Ф.И.Ш., телефон рақам).
“Ўз истеъдодингизни намоён этиш ва Ўзбекистон темирйўллари тарихининг бир қисми бўлиш имкониятидан фойдаланинг”, — дейилади компания хабарида.
Техник топшириқларни қуйидаги ҳавола орқали юклаб олиш мумкин.
Маълумот учун, Ўзбекистонга Жанубий Кореянинг Hyundai Rotem поездларини етказиб бериш бўйича вазифалар президентнинг 2023 йил 10 октябрдаги “Ўзбекистон Республикаси темирйўл транспорт соҳасини тубдан ислоҳ қилиш чора-тадбирлари тўғрисида”ги қарорида кўзда тутилган.
Февраль ойида 6 та юқори тезликда ҳаракатланувчи шундай электропоездларни етказиб бериш истиқболлари муҳокама қилинганди.
Еттита вагонга эга электропоезд 351 та ўриндиққа эга бўлади. Соатига 250 километр тезликда ҳаракатлана олади.
Изоҳ (0)