Ўзбекистонга Испаниядан Talgo компаниясининг 4 та тезюрар “Афросиёб” электропоезди келтирилиши ҳақида хабар берилган эди. “Ўзбекистон темир йўллари” тезюрар поездларни фақатгина Talgo компаниясидан эмас, дунёнинг бошқа компанияларидан ҳам сотиб олиш кўзда тутилганини маълум қилди.
Қайд этилишича, Испанияда бўлиб ўтган Palates Talgo компанияси раҳбари Карлос Паласио Ориол, Ўзбекистон элчиси Жаҳонгир Ғаниев билан бўлиб ўтган учрашувда Ўзбекистон учун яна тўртта Афросиёб электропоезди ишлаб чиқаришга тайёрлигини маълум қилди холос.
Шунингдек, буюртмани молиялаштириш учун Испания ҳукумати ҳузуридаги Испания компанияларини халқаролаштириш жамғармаси (FIEМ)дан узоқ муддатли имтиёзли кредитларни жалб қилиш мумкинлигини таклиф этди холос.
Ҳозирги кунда Ўзбекистонда олтита юқори тезликда ҳаракатланувчи “Афросиёб” электропоездлари йўловчиларга хизмат кўрсатиб келмоқда. Жамият томонидан яқин йиллар ичида замонавий, юқори тезликда ҳаракатланувчи тезюрар поездлар сонини яна 4 тага кўпайтириш режалаштирилган. Эндиликда харид қилинадиган юқори тезликдаги электропоездларни фақатгина Talgo компаниясидан эмас, балки йўловчиларнинг таклифларини ўрганган ҳолда, дунёдаги энг кўзга кўринган замонавий электропоездлар ишлаб чиқарадиган компаниялардан харид қилиш кўзда тутилган.
Хабарда айтилишича, бугунги кунда “Ўзбекистон темир йўллари” акциядорлик жамиятининг мутасадди мутахассислар томонидан мазкур йўналишдаги дунёнинг етакчи компанияларининг таклифлари ўрганилмоқда. Бунда, Ўзбекистоннинг ўзига хос қиш ва ёз мавсумидаги иқлим шароитлари инобатга олинмоқда, йўловчиларни ташиш шароит ва қулайликлари, йўловчилар сиғими ва бошқа жиҳатлар ўрганилмоқда.
2022 йилда “Ўзбекистон темир йўллари” 8 та янги йўналишда темир йўл қатновлари ташкил этиш режалаштирилаётгани, бунинг учун 34 та замонавий электропоезд харид қилинишини маълум қилганди.
Изоҳ (0)