UEFA Millatlar Ligasi chorak final bosqichining javob o‘yinida Ispaniya terma jamoasi safida harakat qilgan Lamin Yamal musobaqa tarixiga kirdi. 
Ispaniyalik futbolchi uchrashuvda gol urib, jamoasining g‘alabasiga hissa qo‘shdi hamda musobaqa tarixida yangi rekord o‘rnatdi.
17 yosh-u 258 kunlik bo‘lgan Yamal turnir tarixida gol urgan eng yosh futbolchi sifatida qayd etildi. Bungacha mazkur rekord uning hamyurti va “Barselona”dagi jamoadoshi Gaviga tegishli edi. Gavi 17 yosh-u 304 kunligida Millatlar Ligasi doirasidagi bahsda o‘z nomiga gol yozdirib qo‘ygan edi.
Ma’lumot uchun, Ispaniya — Niderlandiya bahsi 3:3 hisobida yakunlandi (birinchi uchrashuv — 2:2). Ikki o‘yin natijasiga ko‘ra, g‘olib nomi penaltilar seriyasida aniqlandi. Unda omad Ispaniyaga kulib boqdi hamda “qizil furiya” yarim final yo‘llanmasiga ega chiqdi.
Ispaniya terma jamoasi Millatlar Ligasi yarim finalida Fransiyaga qarshi 4-iyun kuni o‘ynaydi.
“Qizil furiya” musobaqaning amaldagi g‘olibi hisoblanadi. Ular avvalgi finalda Xorvatiyani (0:0, penaltilar seriyasi — 5:4) mag‘lub etib, chempionlikni qo‘lga kiritgan edi.
Izoh (0)