“Операциядан чиқаманми, йўқми билмадим”. Клип съёмкасида жароҳатланган Сабрина Жабборова ўз ҳақиқатлари билан бўлишди

Ўзбекистонда хизмат кўрсатган артист Озода Нурсаидованинг “Дилбарим” клипининг суратга олиш жараёнида жиддий жароҳат олган модел қиз Сабрина Жабборова бир гуруҳ шоу-бизнес вакиллари ва саҳоватпеша ҳамюртларимиз ёрдами билан Туркияга юборилди. У ерлик шифокорлар уни қайта операция қилишади.

Сабрина Жабборова Instagramъда ўтказилган жонли эфирларнинг бирида авария қандай содир бўлгани ва ундан кейинги вазият ҳақида маълумот берди.

— Мен доим тушгача ухлайман, фалокат содир бўлган кун соат 10:30 да қўнғироқ қилиб, клип съёмкасига таклиф қилишди. “Битта қиз съёмкага келолмади, ўрнига сиз чиқиб беринг”, деб илтимос қилишди. Аввалига рад жавобини бердим, аммо илтимос қилаверганидан кейин “Майли, геолокация ташланг, агар яқин бўлса бораман”, дедим. Суратга олиш ишлари “Янги Ўзбекистон” боғи томонда экан. Ўша куни йўлкирага ҳам пулим йўқ эди, шу боис рад жавобини бердим. Ойбек исмли кастинг директори “Унда мен сизни ўзим олиб кетаман”, деди. “Йўқ, шарт эмас”, деб онамдан пул ташлаб беришини сўрадим. Ўша пайтда онам Сурхондарёда эди. Такси чақирдим, аммо анча вақт эшик олдида қолиб кетдим. Чунки уйнинг калитлари негадир тушмади ва анча пайт қулфлай олмадим. Ўша пайтда ҳам бормаслик ҳақида ўйладим, аммо қайта-қайта қўнғироқ қилаверганидан кейин рад этолмадим. Йўлда кетаётганимда, қабристонга олиб борувчи машинани кўрдим. “Нега йўлимдан бундай нарсалар чиқяпти”, деб ҳаёлимдан ўтказдим.

Съёмка майдончасига етиб бордим, аммо кўпчилик менга нотаниш эди. Фақатгина 3 та таниш инсонлар бор эди. Суратга олиш ишлари бошланишидан аввал моделларни икки гуруҳга ажратишди. Ҳар доим евро ва ўзбек қиёфалиларини ажратишади. Сабабини билмадим-у, евро қиёфадагилар олдинга, ўзбекона кўринишдагилар клипнинг орқа планига ўтказилади.

Съёмка бошланган вақтда Севинч Маъруфовнанинг оёғида спорт кетаси эди. Битта ҳайдовчи унга Гелик машинасини бошқаришни ўргатди. Мен пардозчининг ёнида ўтиргандим, оператор Шуҳрат Мавлонов “Нега қизнинг оёғида кета, баланд пошнали туфли кийдирмадинглар?” деб сўради. Ўзи аранг машинани бошқараётган бўлса, баланд пошнали туфли кийдириш шартмикан деб ўйладим.

Аҳад Қаюм Севинч Маъруфовна машина ҳайдашни билади, деган экан. “У машинани бошқариб мени Хоразмгача олиб бориб келган”, деганини ҳам эшитишган. У қиз машинани ҳайдаб, келиши унинг олдида массовка юриши керак эди. Айнан Геликнинг олдида мен, Виктория ва Муҳаммад исмли йигит бор эди. Мен чап томонда эдим, машина ҳаракатланишини айтишмади. Мен юрган вақтимда машина ҳам ҳаракатланди ва мен энди қайриламан деган вақтимда балонни тагига “чирпираб” кетдим. Икки марта балон устимдан ўтди. “Тез ёрдам чақиринглар”, деб бақирдим. Оператор техникаларини йиғиштириб ўтирди, ёнимга ҳеч ким келмади.

Муҳаммад ўртоғим мени чеккага олиб ўтди. Севинч Маъруфовна ёнимга келиб “Вой, кечирасиз босиб юбордим”, деди холос. “Тез ёрдамга” адашиб бошқа манзилни беришибди, шу учун у бир соат деганда аранг етиб келди. Агар ўзлари машинада касалхонага олиб боришганида ҳам қон бунчалик кўп кетмаган бўларди. Мени Чилонзордаги 16-сонли касалхонага олиб кетишаётганди, қон кетяпти деганимдан кейин яқинроқдаги шифохонага олиб киришди. Тушдан кейин қон излашга тушишган, чунки мендан уч ярим литр қон кетган. Икки кун жонлантириш бўлимида, 16 кун оддий палатада даволандим. Жонлантириш бўлимида ётганимда ижодий гуруҳдан ҳеч ким келгани йўқ.

Сабрина Жабборова Севинч Маъруфовна олдига келгани ва молиявий аҳволи ёмон эканлиги ҳақида гапиргани ҳақида айтди.

— Севинч учинчи кун касалхонага келди. Уй ва машинаси йўқлиги, уни мажбурлаб машина бошқарувига ўтказишгани ҳақида гапирди. 18 кунлик даволанишдан кейин уйга кетишимга рухсат беришди. Тўловлар қилиш керак эди, Аҳад Қаюмга қўнғироқ қилсак, Озода Нурсаидованинг маъмури Дилмурод ака билан боғланишимизни айтди. Дилмурод ака эса пулларни Аҳад тўлаши керак, деди. Хуллас, икки ўртада сарсон бўлганимиздан кейин онам “Кредит олиб ўзим харажатларни тўлайман, кейин сенлар билан судда гаплашамиз”, деди.

Аҳад Қаюм келиб, хабар олиб юрди. У ҳамшира ёллаб берди, жароҳатларга малҳам суртиб турарди. Кейин билсак, Аҳад Қаюм ҳатто, ўша ҳамширага ҳам пул бермабди, у аҳволимни кўриб ачинганидан менга ёрдам берган экан. Орада у қиз Аҳад билан тортишиб қолиб, кейин уйимизга келмади. Қолган муолажаларни эса онамнинг ўзи қилди, дейди Сабрина Жабборова.

Сабрина Жабборова ногиронлар аравачаси сабаб Аҳад Қаюмдан ранжигани ҳақида ҳам гапирди.

— Юролмаганим учун аравача сўрадик. Озода Нурсаидованинг маъмури “Ҳозир гаплашиб бераман”, деб “Вақф” фондига қўнғироқ қилди. Уйимизни ва мени видеога олиб, буларни мен олиб бердим деди. Кейин билсам у Озода Нурсаидовани алдаб юрган экан, шундан қаттиқ жаҳлим чиқди. Аҳад Қаюмдан ҳам сўрадик. У чиқиндихонадан олганми билмадим, оёғи синган болалар аравачасини олиб келди. Фонд бир ой ўтиб, ногиронлар аравачасини олиб берди. Аммо уни қабул қилганимиз йўқ. Аҳад Қаюмдан жуда қаттиқ хафа бўлдим. Операциядан чиқаманми йўқми билмадим, шу боис, бу гапларни айтиб беряпман, дейди Сабрина Жабборова.

Сабрина Жабборова онаси билан ижара уйда яшарди. Актриса Шаҳзода Муҳаммедованинг турмуш ўртоғи Марат Хайруллаевич бу оилага янги уй совға қилди.

— Мени ҳамма табриклаганида ҳайрон бўлдим, чуник турмуш ўртоғим бу ҳақида менга айтмаганди. Ҳамкасбларим ва мухлислар миннатдорлик билдиришди. Турмуш ўртоғимнинг бу ишидан қувондим, жуда яхши иш қилибсиз дедим. Қанийди, имкониятимиз бўлганида, бошқа уйсиз инсонларга ҳам ёрдам қилган бўлардик, деди актриса.

Сабрина Жабборовага ёрдам сўраб, унинг карта рақамлари ижтимоий тармоқларга жойлаштирилганидан сўнг, 3-4 кун ичида 365 миллион сўм пул йиғилгани ҳақида маълумот берилди. Айни пайтда Сабрина онаси билан тиббий кўрикдан ўтиш ва операция қилдириш учун Туркиянинг Истанбул шаҳрида бўлиб турибди.