O‘zbekistonda xizmat ko‘rsatgan artist Ozoda Nursaidovaning “Dilbarim” klipining suratga olish jarayonida jiddiy jarohat olgan model qiz Sabrina Jabborova bir guruh shou-biznes vakillari va sahovatpesha hamyurtlarimiz yordami bilan Turkiyaga yuborildi. U yerlik shifokorlar uni qayta operatsiya qilishadi.
Sabrina Jabborova Instagram’da o‘tkazilgan jonli efirlarning birida avariya qanday sodir bo‘lgani va undan keyingi vaziyat haqida maʼlumot berdi.
— Men doim tushgacha uxlayman, falokat sodir bo‘lgan kun soat 10:30 da qo‘ng‘iroq qilib, klip syomkasiga taklif qilishdi. “Bitta qiz syomkaga kelolmadi, o‘rniga siz chiqib bering”, deb iltimos qilishdi. Avvaliga rad javobini berdim, ammo iltimos qilaverganidan keyin “Mayli, geolokatsiya tashlang, agar yaqin bo‘lsa boraman”, dedim. Suratga olish ishlari “Yangi O‘zbekiston” bog‘i tomonda ekan. O‘sha kuni yo‘lkiraga ham pulim yo‘q edi, shu bois rad javobini berdim. Oybek ismli kasting direktori “Unda men sizni o‘zim olib ketaman”, dedi. “Yo‘q, shart emas”, deb onamdan pul tashlab berishini so‘radim. O‘sha paytda onam Surxondaryoda edi. Taksi chaqirdim, ammo ancha vaqt eshik oldida qolib ketdim. Chunki uyning kalitlari negadir tushmadi va ancha payt qulflay olmadim. O‘sha paytda ham bormaslik haqida o‘yladim, ammo qayta-qayta qo‘ng‘iroq qilaverganidan keyin rad etolmadim. Yo‘lda ketayotganimda, qabristonga olib boruvchi mashinani ko‘rdim. “Nega yo‘limdan bunday narsalar chiqyapti”, deb hayolimdan o‘tkazdim.
Syomka maydonchasiga yetib bordim, ammo ko‘pchilik menga notanish edi. Faqatgina 3 ta tanish insonlar bor edi. Suratga olish ishlari boshlanishidan avval modellarni ikki guruhga ajratishdi. Har doim yevro va o‘zbek qiyofalilarini ajratishadi. Sababini bilmadim-u, yevro qiyofadagilar oldinga, o‘zbekona ko‘rinishdagilar klipning orqa planiga o‘tkaziladi.
Syomka boshlangan vaqtda Sevinch Maʼrufovnaning oyog‘ida sport ketasi edi. Bitta haydovchi unga Gelik mashinasini boshqarishni o‘rgatdi. Men pardozchining yonida o‘tirgandim, operator Shuhrat Mavlonov “Nega qizning oyog‘ida keta, baland poshnali tufli kiydirmadinglar?” deb so‘radi. O‘zi arang mashinani boshqarayotgan bo‘lsa, baland poshnali tufli kiydirish shartmikan deb o‘yladim.
Ahad Qayum Sevinch Maʼrufovna mashina haydashni biladi, degan ekan. “U mashinani boshqarib meni Xorazmgacha olib borib kelgan”, deganini ham eshitishgan. U qiz mashinani haydab, kelishi uning oldida massovka yurishi kerak edi. Aynan Gelikning oldida men, Viktoriya va Muhammad ismli yigit bor edi. Men chap tomonda edim, mashina harakatlanishini aytishmadi. Men yurgan vaqtimda mashina ham harakatlandi va men endi qayrilaman degan vaqtimda balonni tagiga “chirpirab” ketdim. Ikki marta balon ustimdan o‘tdi. “Tez yordam chaqiringlar”, deb baqirdim. Operator texnikalarini yig‘ishtirib o‘tirdi, yonimga hech kim kelmadi.
Muhammad o‘rtog‘im meni chekkaga olib o‘tdi. Sevinch Maʼrufovna yonimga kelib “Voy, kechirasiz bosib yubordim”, dedi xolos. “Tez yordamga” adashib boshqa manzilni berishibdi, shu uchun u bir soat deganda arang yetib keldi. Agar o‘zlari mashinada kasalxonaga olib borishganida ham qon bunchalik ko‘p ketmagan bo‘lardi. Meni Chilonzordagi 16-sonli kasalxonaga olib ketishayotgandi, qon ketyapti deganimdan keyin yaqinroqdagi shifoxonaga olib kirishdi. Tushdan keyin qon izlashga tushishgan, chunki mendan uch yarim litr qon ketgan. Ikki kun jonlantirish bo‘limida, 16 kun oddiy palatada davolandim. Jonlantirish bo‘limida yotganimda ijodiy guruhdan hech kim kelgani yo‘q.
Sabrina Jabborova Sevinch Maʼrufovna oldiga kelgani va moliyaviy ahvoli yomon ekanligi haqida gapirgani haqida aytdi.
— Sevinch uchinchi kun kasalxonaga keldi. Uy va mashinasi yo‘qligi, uni majburlab mashina boshqaruviga o‘tkazishgani haqida gapirdi. 18 kunlik davolanishdan keyin uyga ketishimga ruxsat berishdi. To‘lovlar qilish kerak edi, Ahad Qayumga qo‘ng‘iroq qilsak, Ozoda Nursaidovaning maʼmuri Dilmurod aka bilan bog‘lanishimizni aytdi. Dilmurod aka esa pullarni Ahad to‘lashi kerak, dedi. Xullas, ikki o‘rtada sarson bo‘lganimizdan keyin onam “Kredit olib o‘zim xarajatlarni to‘layman, keyin senlar bilan sudda gaplashamiz”, dedi.
Ahad Qayum kelib, xabar olib yurdi. U hamshira yollab berdi, jarohatlarga malham surtib turardi. Keyin bilsak, Ahad Qayum hatto, o‘sha hamshiraga ham pul bermabdi, u ahvolimni ko‘rib achinganidan menga yordam bergan ekan. Orada u qiz Ahad bilan tortishib qolib, keyin uyimizga kelmadi. Qolgan muolajalarni esa onamning o‘zi qildi, deydi Sabrina Jabborova.
Sabrina Jabborova nogironlar aravachasi sabab Ahad Qayumdan ranjigani haqida ham gapirdi.
— Yurolmaganim uchun aravacha so‘radik. Ozoda Nursaidovaning maʼmuri “Hozir gaplashib beraman”, deb “Vaqf” fondiga qo‘ng‘iroq qildi. Uyimizni va meni videoga olib, bularni men olib berdim dedi. Keyin bilsam u Ozoda Nursaidovani aldab yurgan ekan, shundan qattiq jahlim chiqdi. Ahad Qayumdan ham so‘radik. U chiqindixonadan olganmi bilmadim, oyog‘i singan bolalar aravachasini olib keldi. Fond bir oy o‘tib, nogironlar aravachasini olib berdi. Ammo uni qabul qilganimiz yo‘q. Ahad Qayumdan juda qattiq xafa bo‘ldim. Operatsiyadan chiqamanmi yo‘qmi bilmadim, shu bois, bu gaplarni aytib beryapman, deydi Sabrina Jabborova.
Sabrina Jabborova onasi bilan ijara uyda yashardi. Aktrisa Shahzoda Muhammedovaning turmush o‘rtog‘i Marat Xayrullayevich bu oilaga yangi uy sovg‘a qildi.
— Meni hamma tabriklaganida hayron bo‘ldim, chunik turmush o‘rtog‘im bu haqida menga aytmagandi. Hamkasblarim va muxlislar minnatdorlik bildirishdi. Turmush o‘rtog‘imning bu ishidan quvondim, juda yaxshi ish qilibsiz dedim. Qaniydi, imkoniyatimiz bo‘lganida, boshqa uysiz insonlarga ham yordam qilgan bo‘lardik, dedi aktrisa.
Sabrina Jabborovaga yordam so‘rab, uning karta raqamlari ijtimoiy tarmoqlarga joylashtirilganidan so‘ng, 3-4 kun ichida 365 million so‘m pul yig‘ilgani haqida ma’lumot berildi. Ayni paytda Sabrina onasi bilan tibbiy ko‘rikdan o‘tish va operatsiya qildirish uchun Turkiyaning Istanbul shahrida bo‘lib turibdi.
Izoh (0)