Ўзбекистонда хизмат кўрсатган артист Озода Нурсаидова “Дилбарим” қўшиғига ишланган клип съёмка жараёнида жабрланган актриса Сабрина Жабборова воқеасига муносабат билдирди.
— Бу ҳодиса ҳақиқатан клипим съёмкасида бўлган. Аввало клип сёмкаси жараёни қандай ўтказилиши ҳақида айтиб ўтмоқчиман. Санъаткор буюртмачи. Суратга олиш гуруҳи ишни тугатиб санъаткорга топширади. Ижодий гуруҳдаги актёр, актриса, техник ходимлар, уларнинг хавфсизлиги учун мен жавоб бермайман. Ўша куни съёмкада мен бўлмаганман. Воқеа ҳақида телефонда эшитдим. Актриса ўша ердаги оммавий саҳна актрисасини машинада уриб кетибди, дейишди. Мен ҳайрон бўлдим, чунки сценарий бўйича ҳеч ким машина ҳайдаши керак эмасди. ОАВда ёрдам қилинмаган, қон йўқотилган, 02 қилинмаган, деган гаплар кетяпти. Лекин ҳеч ким қараб тургани йўқ. 02 ва 03 га қўнғироқ қилинган, вақтлари ҳам турибди.
Майли, миннат бўлмасин, менинг администраторим бир ой Сабринанинг уйида яшади. Касалхонада нафақат мен, балки суратга олиш гуруҳи ҳамма қўлидан келган ёрдамини қилди. Операция нотўғри қилиниб, бир оёғи калта бўлиб қолган, деган маълумотни ҳам мен ОАВдан билдим. Январь ойида ҳам Сабрина ўрнидан туриб, съёмкаларга бориб юрганини эшитиб биз хурсанд бўлдик. Уни Янги йилда ҳам бориб табриклаб келишди. Биз Сабрина оёққа турибди, деб хурсанд бўлдик. Март ойида ҳам ҳар ой берилаётган моддий ёрдамни бериб келишди, унақа гап йўқ эди. Мен унга қўлимдан келганича ёрдам қилганман. Бундан кейин ҳам ёрдам бераман. Ҳеч ким чапак чалиб ўтиргани йўқ.
Сабрина оёққа туриши учун, яшаш шароитини яхшилаб, қўлдан келганча ёрдам бердик. Шифокорлар 3 ойдан 5 ойгача реабилитация бўлиши мумкин, дегани учун Сабрина уйда боқувчи бўлганини ҳисобга олиб, 5 ой давомида яшаш харажатларини кўтаришга қарор қилдик. Сабринанинг ота-онасига ҳамдардлик билдираман. Яхши иш бўлмади, афсусдаман, дейди хонанда.
Изоҳ (0)