Украина армияси Германиянинг RCH 155 ўзиюрар гаубицасини қабул қилиш билан Швейцария, Буюк Британия, Италия, Нидерландия, Испания, Қўшма Штатлар, ҳатто ишлаб чиқарувчи давлатни ортда қолдириб, биринчи операторга айланди.
Krauss-Maffei Wegmann (KMW) компанияси томонидан ишлаб чиқарилган ўзиюрар артиллерия тизими Кассел шаҳридаги заводда тантанали тарзда топширилди. Маросимда Германия мудофаа вазири Борис Писториус ва Украина элчиси Олексий Макеев иштирок этди.
Бу 2022 йили 54 та техника учун имзоланган шартнома доирасида биринчисидир.
Бироқ RCH 155 артиллерия тизимлари жангга кириши учун бир оз вақт кетиши мумкин. Боиси уларни бошқарадиган экипаж ва техник персонални тайёрлаш зарур. Қолаверса, артиллерия батареясини шакллантириш учун етарли миқдордаги бирликларни ишлаб чиқариш ҳам тақазо қилинади.
У нимаси билан ажралиб туради?
RCH 155 ўзиюрар гаубицаси ўзининг мобиллиги билан машҳур. Boxer 8х8 ғилдиракли платформасининг юқори ҳаракатчанлиги туфайли тизим жанговар позициясини тезда ўзгартириши ва душман жавоб зарбасидан қочиши мумкин.
Тизим бутунлай автоматлаштирилган. Икки кишилик экипаж ҳимояланган капсулада ўтиради. Уни, шунингдек, масофадан бошқариш ҳам мумкин. Бу ҳарбий хизматчилар хавфсизлигини таъминлайди.
RCH 155 НАТО стандартидаги 155 мм калибрли снарядлардан фойдаланади. Ўт очиш масофаси анъанавий ўқ-дорилар билан 30 километр, реактив снарядлар қўлланганда эса 40-54 километргача боради. У бир дақиқада 8 марта ўқ узиши мумкин.
Бироқ тизимнинг энг катта устунлиги ҳаракат вақтида ҳам зарба бера олиши билан боғлиқ. Илғор технологиялар, хусусан, нишонга олиш, навигация ва стабилизация тизимлари шарофати билан бунинг имкони бор.
Германиянинг Украинага ҳарбий ёрдами
Германия ҳукумати Украинанинг Қўшма Штатлардан сўнг иккинчи энг йирик донори ҳисобланади. Мамлакат 2022 йилдан буён 10 мингдан ортиқ украиналик аскарни ҳарбий тайёргарликдан ўтказди.
Бундан ташқари, Берлин Киевни Patriot, IRIS-Т ҳаво мудофаа тизимлари, шунингдек Leopard 2 танклари ва Marder пиёда жанговар машиналари билан таъминлаб келмоқда.
Изоҳ (0)