Швейцарияда 1 январдан бошлаб жамоат жойларида паранжи кийиш ва ниқоб тақиш тақиқланди. Бу ҳақда SwissInfo хабар берди.
Швейцария бундай тақиқни жорий этган бешта Европа давлати, жумладан, қўшни Франция ва Австрия қаторига қўшилди. Тақиқни ноқонуний равишда бузган ҳар бир шахс 1000 Швейцария франкигача (1144 АҚШ доллари) жарима тўлашга мажбур бўлади. Бироқ, ушбу тақиқ самолётларга, дипломатик муассасаларга, зиёратгоҳлар ва бошқа муқаддас жойларга нисбатан қўлланилмайди.
Ибодат ва бошқа муқаддас жойларда юзни ёпиш мумкин. Бундан ташқари, соғлиқни сақлаш, хавфсизлик, об-ҳаво шароитлари ва маҳаллий Швейцария урф-одатларидан келиб чиқиб ҳам юзни ёпишга рухсат берилади. Шунингдек, бадиий ва кўнгилочар тадбирлар пайтида ҳамда реклама мақсадларида юзни ёпиш мумкин.
Истисно ҳолатларда жамоат жойларида юзни ёпишга рухсат берилиши мумкин, агар бу фикр билдириш ёки йиғилиш эркинлигини таъминлаш учун зарур бўлса. Бироқ, бундай ҳаракат олдиндан масъулиятли давлат органи томонидан тасдиқланиши ва жамоат тартиби ёки хавфсизликка таҳдид туғдирмаслиги лозим.
Изоҳ (0)