Австралия ҳукумати 26 август куни Эроннинг Канберрадаги элчисини мамлакатдан чиқариб юборишни маълум қилди. Бу ҳақда Al Arabiya хабар берди.
Таъкидланишича, тегишли қарор Эрон томонидан Сидней ва Мелбурн шаҳарларида амалга оширилган антисемитик ҳужумларга жавобан қабул қилинган. Мамлакатдаги шу ва шунга ўхшаш воқеаларга Австралия бош вазири Энтони Альбанесе қуйидагича муносабат билдирган:
“Бу ҳаракатлар Австралия ҳудудида хорижий давлат томонидан уюштирилган, фавқулодда ва хавфли тажовуз ҳаракатлари бўлиб, жамиятимизнинг бирдамлигини заифлаштиришга ва ижтимоий низоларни кучайтиришга қаратилган”.
Австралия Эрон пойтахти Теҳрандаги элчихонасининг фаолиятини аллақачон тўхтатган ва барча дипломатлари хавфсиз учинчи давлатга кўчирилганини маълум қилган. Шунингдек, Альбанесе ҳукумати Эроннинг Ислом инқилобий қўриқчилар корпусини (Islamic Revolutionary Guard Corps) террор ташкилоти сифатида тан олиш ниятида эканини билдирмоқда.
2023 йил октябрь ойида Исроил ва Ғазо ўртасидаги уруш бошланганидан бери Австралияда яҳудийларга қарши ҳужумлар кўпайган, хусусан, уйлар, мактаблар ва синагогаларда. Бундай воқеалардан бири июль ойида содир бўлиб, унда Мелбурндаги синагогага ўт қўйилганди. Полиция ушбу ҳужумни содир этишда айбланаётган шахсга қарши жиноят иши қўзғаган.
Австралия ва Эрон ўртасидаги муносабатлар сўнгги йилларда таранглашган. Ғазо ва Исроил ўртасидаги можаролар бутун дунёда, жумладан Австралияда ҳам ижтимоий норозилик ва зиддиятларни кучайтирмоқда. Мамлакатдаги яҳудий жамияти бу ҳужумлардан кейин хавфсизлик чораларини кучайтирган ва ҳукуматдан янада кучлироқ ҳимоя талаб қилмоқда.
Изоҳ (0)