Панама президенти Хосе Рауль Мулино 1 февраль куни мамлакатга ташриф билан келадиган АҚШ давлат котиби Марко Рубио билан Панама каналининг тегишлилиги масаласини муҳокама қилишдан бош тортди.
Канал масаласига келсак, бу мумкин эмас. Мен музокаралар олиб бора олмайман, айниқса, канал орқали музокаралар жараёнини бошлай олмайман. Масала ёпилган, канал Панамага тегишли, деди Мулино маҳаллий телевидение орқали эфирга узатилган ҳафталик матбуот анжуманида.
Bloombergънинг тегишли манбага таяниб хабар беришича, АҚШ давлат котиби Панамага сафари чоғида Гватемала, Коста-Рика ва Салвадорда ҳам тўхташни режалаштирган.
Панама президенти Рубио билан учрашув кун тартиби ҳозирча белгиланмаганини таъкидлади.
Бизда, албатта, келишиб олишимиз мумкин бўлган умумий масалалар бор: миграция, наркотрафик, пул ювиш, бизнинг сувларимиз орқали АҚШга гиёҳванд моддалар экспортининг кўпайганлик масаласи, деди Мулино.
Жорий йилнинг 20 январь куни АҚШ Конгрессида инаугурация нутқида Дональд Трамп Панама каналини қайтариб олиш ниятини яна бир бор эълон қилди.
Жуда катта масала — Панама канали. Бу канални Хитой назорат қилмоқда. Бу умуман тўғрими? Бу ёмон ҳолат. Жимми Картер уни берганида, бу даҳшатли хато эди, аммо у Хитойга эмас, Панамага берган эди. Энди эса Хитой Панама каналини назорат қилмоқда. Биз бундай давом этишига йўл қўймаймиз, деган эди Трамп.
Панаманинг БМТдаги элчиси Эла Альваро де Альба таъкидлашича, БМТнинг таъсис низомига мувофиқ, мамлакатлар “ўз халқаро муносабатларида ҳар қандай давлатнинг ҳудудий яхлитлиги ёки сиёсий мустақиллигига қарши куч ишлатиш ёки таҳдид қилишдан тийилишади”.
Хат БМТ бош котиби Антониу Гутерриш номига йўлланган ва Хавфсизлик кенгашининг 15 аъзосига тарқатилган. Панама 2025-2026 йилларда Хавфсизлик Кенгашининг доимий бўлмаган аъзоси ҳисобланади.
Панама президенти муносабати
Президенти Хосе Рауль Мулино канал устидан суверенитет ва эгалик ҳуқуқи Панамада қолишини таъкидлаган.
“Панама халқи номидан мен АҚШ президенти Дональд Трампнинг инаугурация нутқидаги Панама канали ҳақидаги сўзларини бутунлай рад этишим керак. Такрор айтаман: канал Панама ва унинг маъмурияти назорати остида бўлиб қолади.
Дунёнинг ҳеч бир мамлакати раҳбарияти бизнинг ишга аралашмайди. Канал ҳеч кимга қарашли эмас эди. Кураш 1999 йилда тугади ва кейинги 25 йил давомида биз каналга тўхтовсиз раҳбарлик қилиб, уни савдо ва бутун дунё, шу жумладан, АҚШ манфаати йўлида ривожлантириб келдик”, деган у.
Сиёсатчи мулоқот учун ҳар доим жой борлиги, аммо Панама канали суверенитети ва мулки Панамада қолишини қайд этганди.
Изоҳ (0)