Сурхондарё вилояти Қумқўрғон туманида ҳоким ёрдамчиси ўзгалар номига кредит ажратишга эришиб, пулларни ўз эҳтиёжлари учун сарфлаб юборгани маълум бўлди. Бу ҳақда вилоят прокуратураси матбуот хизмати хабар берди.
Қайд этилишича, Қумқўрғон тумани “Тўда” маҳалла фуқаролар йиғини ҳоким ёрдамчиси лавозимида 2022 йил 11 январдан ишлаб келган У.Т. тадбиркорлик фаолияти билан ҳам шуғулланган. У ўтган йилнинг март ойида ўзи таъсисчилигида ташкил этган Волунтеер теам МЧЖни 2023 йил 20 сентябрга қадар бошқариб келган.
Аниқланишича, У.Т. таъминотчи сифатида фуқаро М.Э. ва бошқаларни алдаб, уларнинг электрон имзоларини қўлга киритган. Имзолар ёрдами фуқаролар номига иссиқхона фаолияти ташкил этиш учун тўрт маротаба 33 миллион сўмдан жами 132 миллион сўм кредит ажратилишига эришиб, ушбу пулларни ўзи раҳбарлик қилаётган жамият ҳисобига туширган ва ўзининг эҳтиёжларига ишлатиб юборган.
Мазкур ҳолат юзасидан 2023 йил 9 ноябрь куни Қумқўрғон тумани прокуратураси томонидан У.Т.га нисбатан Жиноят кодексининг 168-моддаси (фирибгарлик) 3-қисми “б, в” бандлари билан жиноят иши қўзғатилган.
Ҳозирда жиноят иши бўйича дастлабки тергов ҳаракатлари Қумқўрғон тумани ИИБ хузуридаги Тергов гуруҳи томонидан олиб борилмоқда. Тергов ҳаракатларининг бориши вилоят прокуратураси томонидан назоратга олинган.
Маълумот учун, У.Т. 2023 йил 31 октябрдан эгаллаб турган ҳоким ёрдамчиси лавозимидан озод қилинган.
Аввалроқ Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилгани, Янгийўл тумани ҳокими маҳаллалардаги 6 нафар ёрдамчисини жазолагани тўғрисида хабар берилганди.
Изоҳ (0)