ДХХ Самарқанд вилояти бўйича бошқармаси ҳамда вилоят ИИБ ходимлари билан ҳамкорликда ўтказилган тезкор тадбирларда бир қатор коррупцион ҳолатларга чек қўйилди.
Хусусан, олиб борилган фаол тадбир давомида Самарқанд давлат университети “Математика” факультети тьютори вазифасида ишловчи 49 ёшли Т.А. вилоят бюджетдан ташқари Пенсия жамғармасининг мансабдор шахслари билан жиноий тил бириктириб, маҳаллий фуқароларнинг меҳнат фаолиятларига 20 йиллик иш стажи қўшиб, нафақага чиқариб бериш эвазига фирибгарлик йўли билан 3 минг долларни олаётган вақтда ушланган.
.jpg)
Худди шундай ўтказилган тезкор тадбирларнинг бирида Жиззах вилояти Ғаллаорол туманида яшовчи 30 ёшли Ў.М. Навоий кон-металлургия комбинатида ишловчи яқин танишларининг имконияти орқали маҳаллий фуқарони комбинатга қарашли “Маржонбулоқ” ва “Зарафшон” олтин конларидан бирига ишга киритишга ёрдам беришини айтиб, ундан 2 минг доллар миқдоридаги пулларни талаб қилиб, олаётган вақтида ушланган.
Шунингдек, ҳамкорликда ўтказилган яна бир тадбирда Самарқанд шаҳрида яшовчи, Самарқанд туманидаги маҳаллалардан бирида ҳоким ёрдамчиси лавозимида ишловчи 34 ёшли Х.Э. ва Паст Дарғом туманида яшовчи, Самарқанд туманидаги маҳаллаларнинг бирида ҳоким ёрдамчиси лавозимида ишловчи 49 ёшли Б.В. жиноий тил бириктиргани аниқланган.
Улар тумандаги маҳалла ҳудудидан оқиб ўтувчи “Сиёб” канали бўйида жойлашган, ҳокимлик захирасидаги 3,5 сотих бўш ер майдонини президент фармонига асосан ёшларнинг тадбиркорлик фаолиятини қўллаб-қувватлаш баҳонасида аукционга чиқариб, ютиб беришни ваъда қилган. Шунингдек, ушбу икки ҳоким ёрдамчиси туман ҳокимлигида ишловчи танишлари орқали кадастр ҳужжатларини қонуний расмийлаштириб бериш эвазига маҳаллий фуқародан 1,3 минг долларни талаб қилиб, олдиндан 1 000 доллар миқдоридаги пулларни бўнак сифатида олаётган вақтда ашёвий далиллар билан қўлга олинган.
Ҳозирда юқорида келтирилган барча шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Бухоро шаҳри “Абу Али ибн Сино” МФЙ ҳоким ёрдамчиси кредит маблағларини ўзлаштирганликда айбланиб, жиноят иши қўзғатилгани, Янгийўл тумани ҳокими маҳаллалардаги 6 нафар ёрдамчисини жазолагани тўғрисида хабар берилганди.
Изоҳ (0)