Қашқадарё вилоятида ўқитувчи ва абитуриентларга “Миллий сертификат” олиб беришни ваъда қилган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментнинг Қашқадарё вилоят бошқармаси томонидан ИИБ ходимлари билан ҳамкорликда тезкор тадбир ўтказилган. Тадбирда Қашқадарё вилояти педагогларни янги методикаларга ўргатиш миллий маркази ўқитувчиси Н.Ш. (муқаддам судланган) ўқитувчи Д.Х.дан 20 нафар ўқитувчининг ойлик маошига устама қўшилишини таъминловчи ва 39 нафар абитуриентга олий ўқув юртига киришга имтиёз берувчи “Миллий сертификат” олиб бериш эвазига жами 17,7 минг АҚШ доллари талаб қилгани аниқланган. У ушбу пулдан 6,6 минг долларни қўлга киритиб, қолган 11,1 минг долларни олган вақтида ашёвий далиллар билан ушланган.
Шунингдек, Н.Ш.нинг кўрсатувига асосан давом этган тадбирда Қарши шаҳридаги “Т”. МФЙ бўйича ҳоким ёрдамчиси Ш.Р. ўқитувчи ва абитуриентларга қалбаки “Миллий сертификат” тайёрлаб бериш эвазига Н.Ш.дан 6,6 минг долларни олгани аниқланган. У яна 11,1 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик), 28, 211-моддаси (пора бериш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Вазирлар Маҳкамасининг 2021 йил 19 майдаги 312-сон қарори билан 2022/2023-ўқув йилидан бошлаб давлат таълим муассасаларининг хорижий тиллар ўқитувчиси лавозимига ишга қабул қилинаётган номзодлар камида B2 даражадаги миллий ёки унга тенглаштирилган мос даражадаги халқаро сертификатга эга бўлиши белгиланган эди. Аввалроқ жорий ўқув йилидан бошлаб янги ишга кираётган хорижий тиллар ўқитувчиларидан B2 даражадаги сертификат талаб қилиниши маълум бўлганди.
Изоҳ (0)