Сурхондарё вилояти Қумқўрғон тумани ҳокимининг “Тўда” маҳалласидаги ёрдамчиси фуқароларни алдаб, уларнинг номига 132 миллион сўмлик имтиёзли кредит расмийлаштирди. Ва маблағларни шахсий манфаатларига сарфлаб юборди. Бу ҳақда вилоят прокуратураси хабар берди.
Маълум қилинишича, ҳоким ёрдамчисининг кирдикори “Муштум” журналининг ижтимоий тармоқлардаги саҳифасида фош этилган.
Қумқўрғон туманининг “Тўда” маҳалла фуқаролар йиғинида фаолият юритувчи ҳоким ёрдамчиси У.Т. тадбиркорлик фаолияти билан ҳам шуғулланиб, таъминотчи сифатида фуқаро М.Э. ва бошқаларни алдаб, уларнинг номига кредит расмийлаштирган. Фуқароларнинг электрон имзоларини қўлга киритган ҳоким ёрдамчиси иссиқхона ташкил этиш учун тўрт маротаба 33 миллион сўмдан жами 132 миллион сўм кредит пулларини ўзи раҳбарлик қилаётган жамият — Volunteer team МЧЖ ҳисоб рақамига ўтказиб, шахсий манфаатига сарфлаб юборган, - дейилади вилоят прокуратураси ахборотида.
Прокуратуранинг қўшимча қилишича, ушбу қилимиши учун ҳоким ёрдамчиси лавозимидан олиниб, унга нисбатан Жиноят кодексининг 168-моддаси 3-қисми “б”, “в” бандлари (фирибгарлик) билан жиноят иши қўзғатилган.
Ҳозирда жиноят иши бўйича дастлабки тергов ҳаракатлари Қумқўрғон тумани ИИБ хузуридаги Тергов гуруҳи томонидан олиб борилмоқда. Тергов ҳаракатларининг бориши вилоят прокуратураси томонидан назоратга олинган, — дейилади расмийлар ахборотида.
Изоҳ (0)