Ғазо секторидаги қочқинлар лагерида сўнгги икки кун ичида саккиз нафар фаластинлик совуқда музлаб, вафот этди. Бу ҳақда Қатарнинг Al Jazeera телеканали маълум қилди.
Ғазо соғлиқни сақлаш вазирлиги расмийсининг сўзларига кўра, Ғазода яна бир чақалоқ гипотермиядан вафот этди. Шу тариқа совуқ ҳаводан вафот этганлар сони саккиз нафарга етди. Бир неча кун давом этган шиддатли ёмғирлар туфайли вақтинчалик бошпаналарни сув босган, ҳаво ҳароратининг пастлиги боис лагерлардаги одамлар музлаб қолишмоқда, деди ССВ расмийси.
Ўз навбатида, Фаластиннинг WAFA ахборот агентлиги Ғазо фуқаролик мудофааси департаментига таяниб, кучли ёмғирлар ўн минглаб кўчирилган оилаларнинг аҳволини оғирлаштирганини қайд этади.
Сув тошқини оқибатида 1500 дан ортиқ чодирлар сув остида қолган, қочқинлар совуқ ҳавода сув босган кийимлар билан қолган. Ғазодаги кўчирилганларнинг кўпчилигида қишки кийимлар йўқ.
Изоҳ (0)