Коинотга чиққан илк сайёҳлар Ерга қайтди (видео)

Polaris Dawn хусусий космик миссияси экипажи тарихдаги илк бор сайёҳларнинг коинотга чиқишини амалга ошириб, Ерга қайтди.

15 сентябрь куни ичида тўрт киши бўлган Dragon капсуласи Флорида яқинидаги Мексика кўрфазининг сувларига парашют билан тушди. Polaris Dawn’нинг биринчи тижорий тадқиқот миссияси 10 сентябрь куни бошланганди. Биринчи куни SpaceX Polaris Dawn миссияси доирасида сайёҳлар капсулани орбитада қолдириб, коинотга муваффақиятли чиққанди. Улар космосда тахминан 15 дақиқа қолган. 

Экипаж таркибига SpaceX билан бирга Polaris миссиясини молиялаштирган миллиардер Жаред Айзекман, АҚШ Ҳарбий-ҳаво кучларининг истеъфодаги подполковниги Скотт Потет,  SpaceX’нинг икки ходими — космик операциялар бўйича етакчи муҳандис Анна Менон ва астронавтларни тайёрлаш бўйича муҳандис Сара Гиллис бўлган.

11 сентябрь куни Polaris Dawn миссияси Ер орбитаси бўйлаб 1400 километр баландликка кўтарилиб, рекорд ўрнатди. Аввалги рекорд 1373 километр бўлиб, Gemini-11 бошқариладиган ҳаво кемасига тегишли эди. Polaris Dawn, шунингдек, аёл томонидан космосга амалга оширилган энг узоқ саёҳатга айланди.