Ўзбекистонда тадбиркорлар кўпроқ қандай масалаларда мурожаат қилаётгани маълум қилинди

Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил “Тадбиркор виртуал офиси” ахборот порталига келиб тушган мурожаатлар таҳлилини эълон қилди.

2023 йил 1 апрель ҳолатига кўра, ушбу порталга жами 1 961 та мурожаат келиб тушган. Мазмунига кўра, мурожаатларнинг 20 фоизи банк ва кредитга оид, 18 фоизи ер майдони ёки бино ажратишга оид, 10 фоизи солиққа оид, 8 фоизи инфратузилмага оид, мансабдор шахсларнинг хатти-ҳаракатига оид, қолган 37 фоизи бошқа масалаларга тегишли.

Мурожаатларнинг аксарият қисми Қашқадарё вилояти (19 фоиз), Тошкент шаҳри (15 фоиз), Сурхондарё вилояти (9 фоиз) ва Самарқанд вилоятига (8 фоиз) тўғри келади.

Келиб тушган мурожаатлар асосида тадбиркорларга 2,131 миллион сўмдан ошиқ кредит ажратилиши, 1,635 миллион сўм пул маблағларини ундиришда, 196 миллион сўм миқдорида асоссиз тўланган солиқ суммалари қайтарилишида ёрдам кўрсатилган.

“Тадбиркор виртуал офиси” ахборот портали орқали келиб тушган мурожаатларни кўриб чиқиш тартиби ва муддати устидан бизнес-омбудсман томонидан назорат ўрнатилган.

Ўрганиш давомида масъул ташкилот ва идоралар томонидан муддат бузилиш ҳолатлари жами 205 та (121 таси тадбиркорлик субъектлари ва 84 таси тадбиркорлик қилиш истагида бўлган фуқаролар) мурожаат кўриб чиқиш муддатларига риоя қилинмасдан жавоб хатлар берилгани аниқланган.

Ҳудудлар кесимида: Қашқадарё вилоятида 47 та, Тошкент шаҳрида 34 та, Самарқанд вилоятида 24 та, Сурхондарё вилоятида 23 та, Тошкент вилоятида 18 та, Бухоро вилоятида 17 та, Андижон вилоятида 12 та, Хоразм, Жиззах вилоятларида 6 тадан, Қорақалпоғистон Республикаси ва Наманган вилоятида 5 тадан, Навоий, Сирдарё вилоятларида 4 тадан.

Тадбиркорлик субъектларининг мурожаатларини кўриб чиқишда қонун бузилиши ҳолатларига йўл қўйган мансабдор шахсларга нисбатан 43 та маъмурий баённома расмийлаштирилиб (ҳокимиятлар 22 та, банклар 4 та, “Ҳудудий электр тармоқлари” АЖ 4 та), тегишли органларга 15 та тақдимнома киритилган.

Тақдимнома ижроси бўйича 29 та масъулга ҳайфсан, 16 нафар ходимга жарима қўлланган, 1 нафар мансабдор шахс билан тузилган меҳнат шартномаси бекор қилинган.