Кунингиз баракали ўтиши учун яхши уйқу ва фойдали нонуштадан ташқари тетиклантирувчи сув ва шарбатлар ҳам ёрдам беради. Тонгда истеъмол қилсангиз, кун давомида энергия ва куч берадиган фойдали ичимликларни қуйида келтириб ўтамиз.
Илиқ сув
Тоза ва совуқ бўлмаган сувни оч қоринга ичиш метаболизмни ишга тушириб, бош оғришининг олдини олади ҳамда ҳазм жараёнини яхшилайди. Унинг бирорта қарши кўрсатмалари мавжуд эмас. Айнан шу сабаб эрталаб бир стакан сув ичиш тавсия қилинади.
Олма cиркаси қўшилган сув
Ошқозон ичак трактини яхшилайдиган, иштаҳа ва ширинликка бўлган мойилликни камайтирадиган олма cиркаси витамин ҳамда тери ҳолатининг яхшиланиши учун аҳамиятли бўлган антиоксидантларнинг кони ҳисобланади. Ушбу маҳсулотнинг ўзига хос хусусиятларини яхши биладиган Виктория Бекҳэм кунини олма cиркаси билан бошлашни одат қилган. Соғлом бўлиш учун икки ош қошиқ олма cиркаси қўшилган сувни нонуштадан аввал истеъмол қилишнинг ўзи кифоя.
Лимон шарбати қўшилган сув
Лимон шарбати ёки лимонли сув ортиқча вазндан азият чекаётганлар учун айни муддао. Таркибидаги табиий кислоталар ёғларни парчалайди, C витамини бисёр экани ҳисобига лимон қўшилган сув иммунитетни мустаҳкамлаб, шамоллашнинг олдини олади.
Занжабилли сув
Кун давомида энергияга тўлиб юриш ва турли шамоллашларнинг олдини олиш учун икки литр қайноқ сувга 3 ош қошиқ қирғичдан чиқарилган занжабил илдизини қўшиш мумкин. Тунда тайёрлаб қўйилган мазкур ичимлик билан кунни бошлаш кайфият яхши бўлишига ҳисса қўшиб, уйқу вақтида пайдо бўлган шишларни бартараф қилади.
Селдерей шарбати
А, C ва B гуруҳи витаминлари, руҳ, калий ва фосфорни ўз ичига оладиган мазкур кўкатда, шунингдек, антиоксидант ва клетчаткалар ҳам бисёр бўлади. Унинг шарбати иммунитетни мустаҳкамлайди, тери ҳолати ва ичаклар фаолиятига ижобий таъсир қилади. Унинг ўзи аччиқлик қилса, бир оз сабзи шарбати қўшиш тавсия қилинади.
Бодринг суви
Бодринг суви турли шишлардан халос бўлишга ва танани токсинлардан тозалашга ёрдам берадиган тоник ва ичимликдир. Бодринг суви токсинларни камайтиради ва метаболизмни тезлаштиради, очлик туйғусини кесади. Ушбу ичимлик иммунитет тизимини мустаҳкамловчи кўплаб витаминларни ўз ичига олади. Бодринг сувини тайёрлаш осон. Бунинг учун сувга майдаланган бодринг қўшинг, таъбга кўра озгина лимон шарбати қўшинг ва истеъмол қилинг.
Изоҳ (0)