Британиялик актриса ва хонанда, Spice Girls гуруҳининг собиқ аъзоси Виктория Бекҳэм ўз одатлари ва кун тартибига қатъий амал қиладиган ва қомати ҳақида жиддий қайғурадиган машҳурлардан. Атрофидаги дунё қанчалик ўзгармасин, у доимо фақат балиқ ва сабзавотларни истеъмол қилади.
Девид Бекҳэм River Cafe Table 4 подкастида рафиқасининг қарийб чорак асрдан бери амал қилиб келадиган парҳези ҳақида сўзлаб берди. Латофатли Бекҳэм хоним умрининг роппа-роса ярми давомида фақат қовурилган балиқ ҳамда сув ёки буғда пиширилган сабзавотларни истеъмол қилиб келмоқда.
“Ёдимда, Виктория фақатгина Ҳарперга ҳомиладор бўлганида бошқа нарса татиб кўрган, ўша кунни мен ҳеч қачон эсдан чиқармайман. Рафиқам айнан нима егани эсимда йўқ, лекин фарзандимиз туғилгач, қайтиб ўша егуликни истеъмол қилмаганини биламан”, деди футболчи.
Виктория Каролин Бекҳэм британиялик хонанда, қўшиқлар муаллифи, раққоса, модель, актриса, мода дизайнери ва тадбиркордир. У 1974 йил 17 апрелда Буюк Британиянинг Ҳарлоу шаҳрида туғилган.
1990 йилларнинг охирида у Spice Girls поп гуруҳи аъзоси сифатида танилган. 2000 йилда у яккахон хонандалик карьерасини яратди. У Rock & Republic учун джинси шимлар моделини ишлаб чиқди ва кейинчалик dVb Style бренди остида тўқимачилик компаниясини йўлга қўйди, Victoria Beckham Style косметика брендига асос солди. Бундан ташқари, у иккита бесцеллер асарни ёзди: бири унинг автобиографияси, иккинчиси мода оламига бағишланди.
Изоҳ (0)