Фото: Ранг-баранг, гавжум ва колоритли Чорсу бозорининг дам олиш кунидаги ҳаёти
Чорсу деҳқон бозори (“Эски Жува”) — қадимдан Тошкентнинг юраги бўлиб келган, шаҳар аҳолиси ва сайёҳлар учун ноёб жойлардан бири. Айниқса, куз фасли кириб келгач, бу бозорнинг кўриниши янада жонланади, ўзига хос ранг-барангликка бурканади.
Кузда деҳқон бозорининг расталари тўлдирилиб, мева-сабзавотлар, полиз маҳсулотлари, турли зираворлар ва ёнғоқлар билан бойитилади. Қип-қизил олма, сарғайган нок, хушбўй беҳи ва турли хил узум навлари бозор расталарида териб қўйилган. Кузги сабзавотлар орасида қовоқ, сабзи, картошка, ва карам ўзига хос ўрин эгаллайди. Айниқса, янги олинган узумдан тайёрланган ширин мурабболар ва қиёмлар харидорлар диққатини тортади.
Чорсу бозори фақатгина савдо жойи эмас, балки Тошкентнинг маданий мероси, одамлар орасидаги мулоқот, урф-одат ва кундалик турмушнинг бир бўлаги ҳамдир. Кузнинг салқин ҳавоси бозордаги муҳитни янада мафтункор қилади.
Ҳар бир харидор кузги неъматлардан баҳраманд бўлиб, қиш учун заҳира қилишни мақсад қилган. Деҳқонлар эса ўз меҳнатининг мевасини кўрсатиш, харидорларга энг сара маҳсулотларни таклиф этиш билан банд. Кузги бозорнинг шу қадар сермазмун ва ранг-баранглиги ҳар бир ташриф буюрувчини ўзига тортиб, Чорсу бозорини ноёб савдо-сотиқ ва маданий марказга айлантиради.
Изоҳ (0)