Ўзбекистоннинг Буюк Британиядаги элчиси Равшан Усманов Европа тикланиш ва тараққиёт банки (ЕТТБ) кенгаши директори Лилиана де Са Кирхкнопф билан учрашув ўтказди.
Суҳбат чоғида Ўзбекистоннинг ЕТТБ билан молиявий ва инвестициявий ҳамкорлигини янада кенгайтириш истиқболлари муҳокама қилинди.
ЕТТБ кенгаши директори Лилиана де Са Кирхкнопф банк ҳозирги кунда Янги Ўзбекистонда барча соҳаларда амалга оширилаётган кенг кўламли ислоҳотларни юқори баҳолашини ва уларни ҳар томонлама қўллаб-қувватлашини билдирди.
Учрашув якунида Ўзбекистонда “яшил” иқтисодиёт, энергетика ва транспорт соҳаларидаги лойиҳаларни ЕТТБ томонидан қўллаб-қувватланиши, шунингдек, аёллар ва ёшлар тадбиркорлиги дастурларини ривожлантириш бўйича ҳамкорликни давом эттиришга келишиб олинди.
ЕТТБ шу кунга қадар Ўзбекистон билан ҳамкорликда жами 164 та лойиҳани амалга оширган. Умумий лойиҳалар портфелининг 52 фоизи хусусий сектор ҳиссасига тўғри келади.
Февраль ойида ЕТТБнинг Ўзбекистондаги раҳбари Анди Аранитаси “Дарё” билан суҳбатда банкнинг барқарор ва инклюзив ўсиш сари кучли интилишидан далолат берувчи мамлакатдаги улкан ташаббуслари ва лойиҳалари ҳақида гапирган эди.
Унда ЕТТБ молиялаштириш механизмлари орқали яшил иқтисодиётни ривожлантиришда муваффақиятга эришгани айтилган эди. Яшил иқтисодиётни молиялаштириш асосининг уй хўжаликларини қамраб олиш учун кенгайтирилиши энергия самарадорлиги ва барқарор амалиётга нисбатан кенгроқ мажбуриятни акс эттиради.
Бундан ташқари, “Ишбилармон ёшлар ва аёллар” дастурлари кам таъминланган жамоаларга молиявий ва техник ёрдам олиш имкониятини таклиф қилиш орқали уларни қўллаб-қувватлашга қаратилган.
Изоҳ (0)