Ирландиянинг Дубльин шаҳрида 5 ноябрь куни икки вазн тоифасида собиқ UFC чемпиони Конор Макгрегорга оид зўравонлик иши кўриб чиқилди. Бу ҳақида Belfast Telegraph нашри хабар қилди.
Жабрланувчининг, яъни сартарош Никита ни Лаймхиннинг таъкидлашича, 2018 йил 9 декабрь куни Макгрегор ва унинг дўсти Жеймс Лоуренс унга жинсий зўравонлик қилган.
Рождество байрами муносабати билан ўтказилган зиёфатдан сўнг, ни Лаймхин Макгрегор билан боғланган ва у Никитани дугонаси билан бирга шахсий автомашинасида олиб кетган. Маълум бўлишича, ўша кеча ирландиялик жангчида гиёҳванд моддалар солинган пакет бўлган. Бир оз вақт ўтгач, улар Жеймс Лоуренснинг уйига етиб борган ва Макгрегор Никитага тегажоғлиқ қила бошлаган. Натижада, Конор унга жисмоний куч ишлатган.
Ҳодиса оқибатида Никита турли тан жароҳатлари олган. Ни Лаймхин Конордан товон пули талаб қилмоқда. Ирландиялик спортчининг адвокатлари аёл товламачилик ва фирибгарлик билан шуғулланишини таъкидлаган. Кейинги суд мажлиси икки ҳафта ичида бўлиб ўтиши кутилмоқда.
Маълумот учун, Конор Макгрегор ўзининг сўнгги жангини 2021 йил 11 июль куни Лас-Вегасдаги UFC 264 турнирида ўтказган эди. Енгил вазн тоифасида америкалик Дастин Порье билан кечган жанг ирландиялик спортчининг мағлубияти ва оёғи синиши билан якунланганди.
Аввалроқ Макгрегор фаолиятини ҳали якунламаганини ва исталган вақтда октагонга қайтиши мумкинлигини айтганди.
Изоҳ (0)