Янги Зеландияда 40 мингдан ортиқ одам маҳаллий маори халқининг ҳуқуқларини чекловчи қонун лойиҳасига қарши намойишга чиқди. Бу ҳақда маҳаллий ОАВ хабар бермоқда.
Парламентга киритилаётган қонун лойиҳасига жавобан намойишчилар Янги Зеландия байроғини кўтариб, миллий қўшиқлар куйлаб, пойтахт Веллингтон кўчаларига чиқди.
Қонун лойиҳаси 1840 йилда Британия вакиллари ва Маори бошлиқлари томонидан имзоланган Вайтанги шартномасига ўзгартиришлар киритишни кўзда тутган. Ушбу шартнома Янги Зеландия давлатини яратишга асос солган деб ишонилади.
Ҳужжатга кўра, Янги Зеландия Буюк Британия назоратига ўтган ва бунинг эвазига маорилар ўзларининг мулкий ва номулкий ҳуқуқларини сақлаб қолган, шунингдек, Британия ҳимоясига эга бўлган.
Қонун лойиҳаси танқидчилари унинг маъқулланиши мамлакатда тартибсизликларга олиб келиши ва маори ҳуқуқларини чеклаши мумкинлигидан хавотирда.
Бироқ қайд этилишича, қонун лойиҳасининг қабул қилиниши эҳтимоли паст.
Парламентдаги маорилар рақси
Эътиборлиси, мазкур қонун лойиҳаси муҳокамасида Янги Зеландия парламентида маори депутатлари норозилик сифатида рақсга тушганди.
Депутатлар залда анъанавий маори рақси — ҳакуни ижро этди. Шу тариқа улар 184 йил аввал инглизлар ва маҳаллий маорилар ўртасидаги шартномани қайта кўриб чиқишга қаратилган қонун лойиҳасига эътироз билдирди.
Изоҳ (0)