Ўзбекистонда бўлиши номақбул деб топилган чет эллик шахсларга оид қонун 15 ноябрдан кучга кирди. Ушбу қонун Қонунчилик палатаси томонидан 25 июнда қабул қилиниб, Сенатда 21 сентябрда маъқулланганди.
Қонун билан “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғриси”даги қонунга Ўзбекистоннинг давлат суверенитетига, ҳудудий яхлитлигига ва хавфсизлигига зид бўлган, давлатлараро, миллий, диний адоватни келтириб чиқарувчи, Ўзбекистон халқининг шаънини, қадр-қимматини, тарихини таҳқирловчи оммавий чиқишларни ёки ҳаракатларни содир этган чет эл фуқароларининг ва фуқаролиги бўлмаган шахсларнинг “Ўзбекистонда бўлиши номақбул деб топилган чет эл фуқаролари ва фуқаролиги бўлмаган шахслар рўйхати”га киритилишини назарда тутувчи ўзгариш ва қўшимчалар киритилмоқда.
Чет эл фуқароси ёки фуқаролиги бўлмаган шахсни ушбу рўйхатга киритиш Олий Мажлис Қонунчилик палатаси кенгашининг, Сенат кенгашининг, махсус ваколатли давлат органларининг тақдимномасига асосан амалга оширилади. Рўйхат Ташқи ишлар вазирлиги томонидан юритилади.
Рўйхатга тушган шахсларга 5 йил давомида Ўзбекистонга кириш, банкларда ҳисобварақ очиш, кўчмас мулк сотиб олиш, давлат мулкини хусусийлаштиришда иштирок этиш, молиявий ва шартномавий муносабатларга киришиши тақиқланади. Бунда улар Ўзбекистонда ҳудудидаги ўз мулкини сотиши ёки ҳадя қилиши мумкин
Чет эл фуқароси ёки фуқаролиги бўлмаган шахс уни рўйхатга киритишнинг тегишли асосларини ушбу муддат ичида бартараф этмаган тақдирда, рўйхатда бўлиш муддати 5 йилга узайтиртилади. Асослар баратаф этилганидан кейин шахс рўйхатдан чиқариш тўғрисидаги мурожаатига ёхуд уни рўхатга киритиш ҳақида тақдимнома берган тегишли давлат ортганининг илтимосномасига асосан муддатидан илгари рўйхатдан чиқарилиши мумкин.
Изоҳ (0)