Тошкент вилоятининг Пискент туманида автогрейдер ҳайдовчисининг эҳтиётсизлиги оқибатида 24 гектарли интенсив боғдаги жами 16 минг тупга яқин олхўри ёниб кетган. Натижада боғ эгасига 2,8 млрд сўмга яқин миқдорда зарар етказилган.
“Дарё” мухбири ушбу ҳолат билан боғлиқ суд ҳужжатларини ўрганди.
Аниқланишича, “Э” хусусий корхонасида автогрейдер машинисти лавозимида ишлаган Б.А. ўзига бириктирилган корхонанинг автогрейдерини 2024 йил 30 май куни соат тахминан 11:30 да Пискент туманида жойлашган “Э” МЧЖнинг олхўри боғи ёнидан ўтган ички дала йўлида бошқариб кетаётган бўлган. Бошқарувидаги автогрейдернинг том қисми йўл устидан ўтган 6 кВ юқори кучланишдаги электр симларига тегиши оқибатида чақнаш келиб чиқиб, ёнғин юзага келган. Айбланувчи ҳодиса иш вақтида содир бўлганини маълум қилган.
Натижада ушбу ҳудудда жойлашган “Э” МЧЖнинг 24 гектар ер майдондаги интенсив олхўри боғида мавжуд жами 15984 туп олхўри дарахтлари ва томчилатиб суғориш тизими нобуд бўлган.
Ўрганишлар давомида етказилган зарар миқдори 2 миллиард 808 миллион сўмга баҳоланган.
Суд жараёнида жабрланувчи 2019 йилда туман ҳокимлиги томонидан унга 391 гектар ер майдони ижара асосида боғдорчилик ва сабзавот йўналиши бўйича ажратилиб берилгани, шундан жами 24 гектар ер майдонига олхўри кўчатлари экилгани, ҳар йили ушбу боғдан йилига ўртача 200 000 доллар даромад олишини, ҳосилни экспорт ёки ички бозорга чиқаришини билдирган. Шунингдек, 2024 йил баҳорда боғга нархи 28 800 доллар бўлган томчилатиб суғориш тизимини ўрнатганини ҳам қўшимча қилган.
Суд ҳукми билан Б.А. Жиноят кодексининг 198-моддаси 1-қисми билан айбдор деб топилиб, унга нисбатан иш ҳақидан 20 фоизини давлат даромади ҳисобига ушлаб қолган ҳолда 1 йил ахлоқ тузатиш ишлари жазоси тайинланган. Шунингдек, автогрейдер хусусий корхонага тегишли экани, ҳолат иш вақтида юз бергани инобатга олиниб, етказилган 2 млрд 808 млн сўм зарурни хусусий корхонадан ундириш белгиланган.
Изоҳ (0)