Чотқол қўриқхонасига қарашли ҳудудда ёнғин содир бўлгани ҳақида хабар берилган эди. ФВВ матбуот хизмати ушбу ёнғин ҳақида маълумот берди.
Унга кўра, кичик ёнғин 8 июль куни кечаси Чотқол давлат биосфера қўриқхонасининг Майдонтол бўлими ҳудудида содир бўлди. Фавқулодда вазиятлар вазирлигининг Ўрмон ёнғинларини бартараф этиш махсус отряди зудлик билан воқеа жойига етиб борди.
Қисқа вақт ичида ФВВ ходимларининг тезкор ва малакали ҳаракатлари натижасида ёнғин ўчирилди ва шу орқали ўрмоннинг катта ҳудудига тарқалиши мумкин бўлган ёнғиннинг олди олинди. Жараёнга Мудофаа вазирлиги, шунингдек, Экология, атроф-муҳитни муҳофаза қилиш ва иқлим ўзгариши вазирликларининг куч ва воситалари ҳам жалб этилди.
Telegramъдаги “Новости Tashkentского неба” каналининг ёзишича, ёнғинни ўчиришга Н-215М Super Puma ва H-125 вертолётлари жалб этилган.
Ёнғинни бартараф этиш жараёни фавқулодда вазиятлар вазири А.Х.Қўлдошев томонидан назоратга олинди.
Июль ойининг бошларида Тошкент вилояти Пискент туманидаги ўрмонзорларда ёнғин содир бўлганди. Ҳолат юзасидан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва 207-моддаси (мансабга совуққонлик билан қараш) билан жиноят иши қўзғатилган. Бош прокуратура томонидан мазкур жиноят иши тергови устидан назорат ўрнатилган.
Изоҳ (0)