“Бойсунда оммавий заҳарланишлар йўқ” — ФВВ Сурхондарёдаги газ конидаги вазият ҳақида изоҳ берди

Бойсунда 1 сентябрь куни “Мустақилликнинг 25 йиллиги” конига қарашли қудуқда бурғилаш ишлари вақтида технологик жараённинг бузилиши оқибатида олтингугурт гази чиқиши кузатилган эди. Орадан 10 кун ўтган бўлса-да, газнинг чиқиши тўхтагани йўқ ва бундан аҳоли, кенг жамоатчилик норози бўлмоқда. Масъуллар вазият қандайлиги хусусида аниқ маълумотлар беришгани йўқ.

Бугун, 11 сентябрь куни АОКАда бўлиб ўтган матбуот анжуманида ФВВ матбуот хизмати раҳбари ўринбосари Самандар Ҳикматуллаев мазкур ҳолат юзасидан изоҳ берди. Унинг айтишича, ҳудудда ҳукумат комиссияси иш олиб бормоқда ва ҳолат яқин кунларда бартараф қилинади.

Газнинг табиатга чиқараётган зарарини камайтириш мақсадида сизиб чиққан газ ёндириб қўйилган. Бу тажриба бутун дунёда бор. Шамол қайси томонга эсса газ ўша томонга қараб эсиб боради. Бу ер тоғолди ҳудуд бўлгани боис турли томонлардан шамол эсади.

Ўша ҳудуддаги бир нечта қишлоқ аҳолиси эвакуация қилинган. Лекин аҳоли яшаш жойига қайтиб келиш ҳолатлари кузатилмоқда. Оммавий заҳарланишлар йўқ. Тўғри, мол-ҳолларини, уй-жойларини кўриш учун келган фуқароларда айрим ҳолларда заҳарланиш ҳоллари бор. Бу енгил заҳарланиш. Шифокорга мурожаат қилганидан сўнг қисқа вақт ичида булар керакли ёрдамни олиб, шифохонадан чиққан ҳолатлар бор. Улар ўз ишларини давом эттирмоқда, деди Самандар Ҳикматуллаев.

ФВВ масъулининг қўшимча қилишича, яқин кунларда бу конни жиловлаш ишлари олиб борилади, аммо муддати аниқ эмас.

Нима бўлган эди?

1 сентябрь куни соат 15:17 да Сурхондарё вилояти Бойсун тумани “Кўлқамиш”  МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилган.

Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинган. Фуқароларнинг тан жароҳати олиш ва ҳалок бўлиш ҳолатлари қайд этилмаган.

Президентнинг шахсан топшириғига асосан, Бош вазир ўринбосари Очилбой Раматов, Фавқулодда вазиятлар вазири генерал майор Абдулла Қўлдошев, Энергетика вазири Жўрабек Мирзамаҳмудов, Сурхондарё вилояти ҳокими Улуғбек Қосимов ҳамда “Ўзбекнефтгаз” бошқарув раиси Баҳодир Сиддиқов ҳодиса жойига етиб борган.

Энергетика вазири томонидан тарқатилган маълумотда айтилишича, бу ерда барча тегишли вазирлик ва ташкилотларни жалб этган ҳолда, Тезкор штаб ташкил қилингани техноген офат асоратларини бартараф этиш бўйича зарур чоралар кўрилмоқда.