Бойсун туманидаги “Мустақилликнинг 25 йиллиги” конида 17 сентябрь куни юз берган технологик жараёнда икки нафар шахс вафот этган. Бу ҳақда 18 сентябрь куни АОКАда бўлиб ўтган матбуот анжуманида Бош прокуратура бошқарма бошлиғи Ўктам Ўтаев маълум қилди.
Бойсунда 1 сентябрь куни “Мустақилликнинг 25 йиллиги” конига қарашли қудуқда бурғилаш ишлари вақтида технологик жараённинг бузилиши оқибатида олтингугурт гази чиқиши кузатилган эди. Кейинроқ мазкур кон ёпилгани маълум қилинганди. Мазкур конда 17 сентябрь куни яна газ чиқиш ҳолати юз берган.
Ўлим ҳолати бўлган. Воқеа оқибатида икки нафар шахс вафот этган. Яна тан жароҳати олганлар ҳам бор. Ҳозир ҳолат юзасидан терговолди ҳаракатлари олиб борилмоқда. Натижаси бўйича маълумот берилади.
Воқеа жойига шахсан вилоят прокурори туман прокуратураси ва тегишли мутахассислар иштирокида етиб борган. Бу техноген ҳолат бўлгани учун ҳам мутахассисларнинг хулосасига асосланган ҳолда қонуний қарор қабул қилинади, деди Ўктам Ўтаев.
Унинг алоҳида таъкидлашича, аҳолига компенсация бериш масаласида ҳеч қандай муаммо бўлмайди.
Давлат раҳбари томонидан ўша куннинг ўзида ҳукумат комиссияси тузилган. Комиссия таркибида ФВВ, экология, соғлиқни сақлаш, прокуратура ва бошқа идоралар ходимлари бўлган. Ҳудуддаги бир неча қишлоқлар аҳолиси эвакуация қилинган ва тегишли жойларга жойлаштирилган. Ижтимоий тармоқларда ҳам кўрдикки, “маҳаллий ҳокимият органлари томонидан уларнинг ҳолидан хабар олиндими, компенсацион тўловлар тўландими”, деган саволлар берилди. Буларнинг барчаси давлат томонидан назоратга олинган. Тегишли тартибда қонуний тўхтамга келинади. Бунда ҳеч қанақа муаммо бўлишига ёки шубҳага ўрин йўқ, деди прокуратура вакили.
Аввалроқ ФВВ масъул ходими Бойсунда оммавий заҳарланишлар йўқлигини айтган эди.
Изоҳ (0)