Ижтимоий тармоқда бир йигитнинг TikTok’да 100 мингта лайк учун отасини уришини айтгани акс этган видео тарқалди.
Йигит видеони TikTok платформасига жойлаши, агар 200 минг лайк йиғса, отасини қариялар уйига юборишини ва ўзининг бу сўзларига жавоб беришини ҳам айтган.
“Гапни кўпайтирмайман. Агар ушбу видеомиз юз мингта лайк тўпласа, адамни ураман. Жағга жавоб, юз фоиз айтяпман, гапга жавоб берадиган боламан. 24 соат ичида 100 минг лайк йиғилса, ўша пайт бориб, отамни уриб, видеога олиб TikTok платформасига жойлайман. Кўрасизлар”, дейди йигит.
Аниқланишича, видео жорий йилнинг 1 ноябрь куни тасвирга олинган. У.С. исмли йигит видеони ҳазил тариқасида олганини, кутилмаганда тарқалиб кетганини билдирган. Унинг сўзларига кўра, бу ҳолат бошқа такрорланмайди.
Тошкент вилояти ички ишлар бош бошқармаси матбуот котиби Бобур Тўлаганов ушбу ҳолат бошқарма томонидан назоратга олинганини, ҳолатга ҳуқуқий баҳо бериш учун тегишли ҳужжатларни расмийлаштириш ишлари олиб борилаётганини, натижаси бўйича ахборот берилишини билдирди.
Изоҳ (0)