Ўзбекистон Ички ишлар вазирлиги блогерлар Санжар Икромов ва Шерали Комиловни қидирувга бергани ҳақида хабар берилган эди. Вазирлик “Дарё”га уларнинг барча жиноятларини маълум қилди.
Маълум қилинишича, 1988 йилда туғилган Икромов Санжар 2011 йилнинг 1 март куни Тошкент шаҳри Олмазор туманида фуқаро Ф.Х.дан ўзини автомашиналар олди-сотдиси билан шуғулланишини айтиб, Сергели автомашиналар бозоридан арзон гаровга Nexia’ни олиб беришни ваъда қилган. Жабрланувчидан 20 миллион сўм пулларини алдов йўли билан ундириб, ўз эҳтиёжларига ишлатиб юборганликда айбланади.
Ҳолат юзасидан 2012 йил 31 март куни Олмазор тумани ИИБ томонидан Жиноят кодексининг 168-моддаси 3-қисми “а” банди билан жиноят иши қўзғатилган бўлиб, гумондор Санжар Икрамов терговдан яширингани сабабли, унга нисбатан қидирув эълон қилинган.
Шунингдек, 1979 йилда туғилган Комилов Шерали Набихонович, муқаддам 2011 йилда Жиноят кодексининг 165-моддаси, 2022 йил 14 мартда 168-модда 3-қисми “б” банди билан судланган бўлиб, тузалиш йўлига ўтмасдан ўзининг жиноий ҳаракатларини давом эттириб,
- 2021 йилнинг 6 июнь куни фуқаро Ш.С.га (аёл) ўзини мустақил журналист ва блогер, деб таништириб, аёлнинг ўғли 1999 йилда туғилган Ш.А.га нисбатан Косон тумани жиноят ишлари судининг Жиноят кодексининг 119-моддаси 3-қисми “б” банди ҳамда 137-моддаси 2-қисми “а,в” бандлари бўйича ҳукмини ижтимоий тармоқлар орқали эълон қилиб, сунъий шов-шув кўтариб, суднинг кейинги инстанция қарорларига таъсир ўтказиб, жазони енгиллаштириб беришни ваъда қилган, ҳамда жабрланувчидан 5 миллион сўм миқдорда пул ундириб, ўз эҳтиёжларига сарфлаб юборган;
- 2021 йилнинг 17 декабрь куни Қашқадарё вилояти Қарши шаҳрида фуқаро С.Г. (аёл)нинг, ишончига кириб, собиқ турмуш ўртоғи қарз бўлиб қолган маълум миқдордаги алимент пулини ундириб беришни ваъда қилиб, жабрланувчидан алдов йўли билан 5 миллион сўм миқдорида пулини олиб, ўз эҳтиёжларига ишлатиб юборган;
- 2021 йилнинг декабрь ойида фуқаро Қ.Х.ни уй-жой билан боғлиқ муаммоли масаласини ҳал этиб беришни ваъда қилиб, жабрланувчидан турли вақтларда, 3 миллион, сўнг 300 АҚШ доллари миқдорида пулларини алдов йўли билан ундириб, ўз эҳтиёжларига ишлатиб юборган;
- 2022 йилнинг 19 декабрь куни ижтимоий тармоқлар орқали Қарши шаҳар 5-сон тергов ҳибсхонаси ходими М.А. ва Қарши шаҳар ИИБ вақтинча сақлаш ҳибсхонаси ходими Б.Б.ни шаъни ва қадр қимматини камситувчи сўзлар билан ҳақорат қилганликда айбланади.
Ҳозирда Шерали Комилов Жиноят кодексининг 168-моддаси 3-қисми “б” банди, 140-моддаси 3-қисми “а” банди билан қўзғатилган жиноят ишлари доирасида хавфли ресидивист, деб топилиб, тергов органларидан яширинганлиги сабабли, қидирув эълон қилинган.
Мазкур шахсларни яширинган жойи ҳақида хабардор бўлган фуқаролардан 102 рақамига ёки ички ишлар органларига хабар беришлари сўралган.
Изоҳ (0)