Республиканинг барча ҳудудлари бўйича 5 ноябрь, сешанба кунидан ҳаво ҳарорати аста-секин пасайиши бошланади, деб хабар бермоқда “Ўзгидромет”.
Маълум қилинишича, 4 ноябрь куни Ўзбекистон ҳудудининг катта қисмида ноябрь ойининг боши учун деярли илиқ об-ҳаво сақланиб туради. Ҳаво ҳарорати 20-25 даража илиқ атрофида бўлади. Фақат республика шимолида ҳаво ҳарорати 8-13 даража илиққача пасаяди.
Қорақалпоғистон Республикаси, Хоразм, Бухоро, Навоий вилоятларида ва куннинг иккинчи ярмида Тошкент, Самарқанд, Жиззах, Сирдарё, Қашқадарё вилоятларида баъзи жойларда ёмғир ёғади.
Ҳаво ҳарорати 5 ноябрда кундузи 13-18 даража илиқ, 6 ноябрда 10-15 даража илиқ атрофида бўлади, 7—8 ноябрда эса ҳарорат 5-10 даража илиққача пасаяди.
Кечалари совуқ бўлади. Республика ҳудудининг катта қисмида 7—8 ноябрь кунлари ҳарорат кечалари 0-5 даража илиққача, баъзи жойларда 2 даража совуққача, Устюртда 3-4 даража совуққача пасаяди.
5—6 ноябрь кунлари республиканинг барча ҳудудлари бўйича ёмғир ёғади, баъзи жойларда кучли бўлади.
7—8 ноябрда ҳудуднинг катта қисмида ёмғир кузатилмайди. 7 ноябрь куни Сурхондарё вилояти ва Фарғона водийсида, шунингдек, 7—8 ноябрь кунлари Қорақалпоғистон Республикаси ва Хоразм вилоятининг айрим жойларида бир оз ёмғир ёғади. Шимолда ёмғир ва қор кўринишидаги аралаш ёғингарчилик бўлиши эҳтимоли бор.
Тоғларда вақти-вақти билан ёғингарчилик (ёмғир, баъзи жойларда қорга айланади) бўлади, 5—6 ноябрда баъзи жойларда кучли бўлади.
Республика бўйича баъзи жойларда шамол тезлиги 15-20 метр/секундгача кучайиши мумкин. 7—8 ноябрь кунлари айрим жойларга туман тушади.
Об-ҳаво Тошкент шаҳрида:
Тошкентда 4 ноябрда кечга томон ёмғир ёғади, 5—6 ноябрда вақти-вақти билан ёмғир ёғади, 7—8 ноябрда ёғингарчилик кутилмайди. Ҳаво ҳарорати 4 ноябрда кундузи 23-25 даража илиқ, 5 ноябрда 15-17 даража илиқ, 6 ноябрда 10-12 даража илиқ, 7—8 ноябрда 7-10 даража илиқ бўлади. 5—6 ноябрда кечалари 10-12 даража илиқ, 7 ноябрда 4-6 даража илиқ, 8 ноябрда 0-3 даража илиқ бўлади.
Сизни қизиқтириши мумкин:
Ўзбекистоннинг айрим жойларида 6 ноябрь куни кучли ёмғир ёғади
Изоҳ (0)