Тошкент шаҳри Чилонзор туманида 21 ёшли йигит терговдан қочиш мақсадида ҳожатхонадан пастга сакраб, вафот этгани тўғрисида хабар берилганди. Бош прокуратура матбуот котибининг маълум қилишича, ҳолат юзасидан жиноят иши қўзғатилган.
“Чилонзорда 21 ёшли йигитнинг ўлими билан боғлиқ ҳолат юзасидан Жиноят кодексининг 208-моддаси (ҳокимият ҳаракатсизлиги) билан жиноят иши қўзғатилди”, — дейилади хабарда.
Фуқаро Х.Т. чўнтагида “гашиш” гиёҳвандлик воситасини сақлаб келганлиги аниқланиб, 22 май куни Чилонзор тумани ИИО ФМБ ЖҚБ гиёҳвандликка қарши курашиш бўлимига олиб келинган.
Бинонинг 4-қаватига суриштирув ҳаракатларини ўтказиш учун олиб чиқилган Х.Т. жавобгарликдан қочиш мақсадида шу қаватда жойлашган ҳожатхонага кириб, тезкор ходимнинг чалғиши натижасида ҳожатхонанинг деразасидан, пастда жойлашган ошхонанинг шифер билан қопланган том қисмига сакраган. Шифернинг четки қисми синиши оқибатида Х.Т. бош қисми билан ернинг бетон қопламасига қулаб тушган.
Жароҳатланган фуқаро ички ишлар органлари ходимлари томонидан шифохонага олиб борилган. Х.Т.га кўрсатилган тиббий ёрдамга қарамасдан, олган тан жароҳатлари оқибатида, 29 май куни шифохонада вафот этган.
Бош прокуратура ҳолат бўйича тарқалган миш-мишлардан келиб чиққан асоссиз маълумотларга ишонмасликни сўраб, йигитнинг ўлимига оид қўшимча маълумотлар ҳамда фото-видео далилларни эълон қилганди.
Терговдаги қийноқлар
5 июнь куни Тошкент вилояти Бўка туманида терговга жалб қилинган фуқаро шифохонада вафот этгани тўғрисида хабар берилганди. Ҳолат юзасидан Жиноят кодексининг 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан жиноят иши қўзғатилган. Воқеага алоқадор бўлган 2 нафар тезкор ходим ҳибсга олинди. Тергов ҳаракатлари давом этмоқда.
“Ҳозирда ижтимоий тармоқларда ушбу ҳолат юзасидан турли асосланмаган маълумотлар тарқалмоқда. Мазкур ҳолат вилоят прокуратураси томонидан алоҳида назоратга олинган бўлиб, терговни чалғитувчи, миш-мишлардан келиб чиққан асоссиз маълумотларга ишонмасликларингизни ҳамда расмий манбалар орқали берилаётган маълумотларга таянишингизни сўраб қоламиз”, — дейилади Тошкент вилояти прокуратураси баёнотида.
Ўз навбатида Олий Мажлиснинг Инсон ҳуқуқлари бўйича вакили сўнгги пайтларда ижтимоий тармоқлар орқали суриштирув ва тергов жараёнларида ёки жазони ижро этиш муассасаларида фуқароларга жисмоний ва руҳий босим ўтказиш, қийноққа солишга оид қатор хабарлар тарқалиб, кенг жамоатчилик эътирозларига сабаб бўлаётганига муносабат билдирди.