Тошкентнинг Чилонзор туманидаги 188-мактабда дарс пайти 6-синф ўқувчисини урган аёл жаримага тортилди, мактаб директори эса ишдан олинди.
“Газета.уз”га ҳуқуқ-тартибот идораларидаги манбаларининг маълум қилишича, расман ҳеч қаерда ишламаган (2014 йилдан буён вақти-вақти билан Россия ва Қозоғистонга ишлаш учун бориб турган) О.Р. 23 сентябрь куни 188-сонли мактабнинг директор ўринбосари лавозими учун суҳбатга келган. Мактаб директори унга ҳали ҳужжатлар расмийлаштирилмай туриб синов муддатида рус тилида ўқитиладиган 6-синф ўқувчиларига рус тили ва адабиёти фанидан дарс беришни тайинлаган.
23 сентябрь, ишининг биринчи кунида у 6-синфдаги ўқувчи билан жанжаллашиб қолган. Аёл икки тилда: рус ва ўзбек тилларида дарс берган. Ўқувчилардан бири (миллати бўйича татар) ундан рус тилида дарс беришни сўраган. Бола билан жанжаллашиб қолган аёл унинг қулоғидан тортиб, доска томон итариб юборган, юзига тарсаки туширган ва бошини доскага урган.
Воқеадан хабар топган ўқувчининг ота-онаси шу куниёқ Чилонзор тумани ИИБга мурожаат қилган. Судда боланинг онаси ўша куни ўғли уйга тушкун ҳолатда келганини ва мактабга боришни истамаётганини билдирган. Онаси уни шифокорга ҳам олиб борган.
24 сентябрда она дарс ўтган аёлга қўнғироқ қилиб, вазиятга ойдинлик киритганида у ҳақоратомуз сўзлар билан жавоб қайтарган. Боланинг отаси телефон қилганида уни ҳам ҳақорат қилган. Эркак судга суҳбатнинг ёзувини тақдим этган.
Шу куни О.Р. қизи ўқиётган бошқа мактабга бориб, жанжаллашиб, мактаб директори ўринбосари бўлган аёл Ғ.М.га нисбатан жисмоний куч ишлатган. Аёлдан жамоат тартибига риоя қилиш сўралганида, мактаб ҳудудида Миллий гвардия ва ИИО ходимларига нисбатан ғайриижтимоий муносабатда бўлиб, уларнинг қонуний талабларини бажармасдан кескин қаршилик кўрсатган.
25 сентябрь куни иш судда кўриб чиқилиб, унга 7 сутка маъмурий қамоқ жазоси, БҲМнинг 3 баравари (1 020 000 сўм) ва БҲМнинг 7 баравари (2 380 000 сўм) миқдорида жарима жазоси тайинланганди.
О.Р. ҳибсни ўтаётган махсус тергов ҳибсхонасидан қатнашган судда ўз айбига қисман иқрор бўлди. Суд иш материалларини, шу жумладан, видео ва аудио далилларни ўрганиб чиқиб, ишнинг Маъмурий жавобгарлик тўғрисидаги 41-моддаси (ҳақорат қилиш), 52-модданинг 2-қисми (қасддан баданга енгил тан жароҳати етказиш) ва 59−2-моддаси (оилавий (маиший) зўравонлик) билан тўғри квалификация қилинганини қайд этган.
Маъмурий ҳуқуқбузарликлар тўғрисидаги кодекснинг 34-моддаси (бир неча ҳуқуқбузарликни содир этганлик учун маъмурий жазо қўллаш) инобатга олинган ҳолда, О.Р.га давлат фойдасига БҲМнинг 20 баравари (6,8 миллион сўм) миқдорида жарима тайинланди.
Аёл ўқувчини ургани акс этган видео тарқалган куни туман ҳокимлигида ота-оналар ва мактаб маъмурияти иштирокида йиғилиш ўтказилган. 188-мактаб директори ҳеч қандай ҳужжат тўлдирмасдан дарсга бегона одамни киритгани учун лавозимидан озод этилган.
Изоҳ (2)
Tog'ri jazo yaxshi lekin sal narsaga jarimalar berilaversa kelajakda o'qituvchi zoti yo bolib ketadiku.Hech qaysi bola men o'qituvchi bolaman deb chiqmaydiku.Ishga olayapganda ham oldin pisixalogik testdan otkazib keyin ishga olish kerak edi shu yerda ham tagini korsa poraxorlik bor.
Tog'ri gaplarni aytiz qoshilaman.Aslida rus sinflarda kopi o'zbek bolalari bor ular ham darsliklari o'zbekcha yozilishini hohlaydi.Darsliklarini rus tilida chop etilgan variantni berganini oqolmaydigan bollar ham bor.Shu sinflarga e'tiborli bolishni va qayta sinflarga bolishni maslahat bermoqchidim.