Қирғизистонда байроқ рангини ва мадҳия сўзларини ўзгартириш таклиф қилинди

Бугун, 6 октябрь куни Қирғизистон парламенти (Жогорку Кенгеш) мажлисида депутат Арсланбек Малиев мамлакат давлат рамзларига тузатишлар киритишни таклиф қилди, деб ёзади Asia Plus.

Хусусан, халқ депутати байроқнинг рангини ҳамда мадҳия сўзларини ўзгартирмоқчи. Малиевнинг  байроқнинг ранги СССР даврида танланганини пеш қилмоқда.

«Тарихга мурожаат қиладиган бўлсак, қирғизларнинг байроғи кўк рангда бўлган. Шунинг учун биз ўша рангни қайтаришимиз керак. Бундай қонун лойиҳаси аллақачон тайёрланмоқда. Мадҳияда ҳам баъзи сўзларни тузатиш зарур. Ўз тарихий рамзларимизга қайтиш вақти келди», — деди у.

Аввалроқ Арсланбек Малиев мамлакат номини ўзгартиришни таклиф этганди. У таклиф қилган вариантлар орасида Қирғиз эли, Қирғиз каганати, Қирғизжер бор эди.

Байроқ номини ва мадҳия сўзларини ўзгартириш масаласи Қирғизистонда биринчи марта кўтарилаётгани йўқ.

2011 йилдаёқ парламент фракцияси депутатлари, шунингдек, жамоатчилик вакилларидан иборат комиссия мадҳиядаги 5—6 та сўз чалғитувчи маънога эга, деган хулосага келиб, уларни оҳангдорроқ ва маънолироқ сўзлар билан алмаштиришни таклиф этганди.

Давлат байроғи борасида эса парламент аъзолари гуруҳи қизил ранг агрессия ва уруш маъносига эга эканини маълум қилганди.