Ҳар бир бола тўкис оилада, ота-онаси бағрида улғайишни истайди. Афсуски, турли сабаблар билан эр-хотин бир-бири билан ажрашади ва бундан кўпроқ болалар жабр кўради. Нотўкис оила, меҳрсиз ота-она, депрессия ва моддий етишмовчиликлар сабаб баъзи болаларнинг ахлоқида ҳам ўзгаришлар сезилади. “Надомат” лойиҳасининг навбатдаги суҳбатдоши бўлган маҳкум эндигина 18 ёшни қаршилаган. У 2023 йили бир гуруҳ тенгдошлари билан етказган оғир тан жароҳати сабаб 16 ёшли бола вафот этгани учун озодликдан маҳрум этилган.
Маҳкум 16 ёшда, у 24-сонли тарбия колониясига 2023 йилнинг август ойида келтирилган. Унга Жиноят кодексининг 104-модда 3-қисми “д” банди билан суд ҳукми ўқилиб, 5 йилга озодликдан маҳрум этилган.
— 2017 йили ота-онам ажрашиб кетишган. Унгача ҳам анчагина оилавий жанжаллар бўлиб ўтди. Онам иккимиз алоҳида яшай бошладик. Уйимиз йўқлиги учун ижарага кўчиб ўтдик. Пулдан кўп қийналардик. Шу боис онам 2021 йилнинг август ойида ишлаш учун Россияга кетди. Мен ёлғиз ўзим Фарғонадаги ижара уйда қолдим. Пулдан қийналганим учун ишлашга мажбур бўлгандим. Истироҳат боғида майда-чуйда ишларни қилиб, тирикчилик қилардим. Ўша ерда ўзимдан катта болалар билан танишдим. Улар “Сенга яхши иш топиб берамиз”, дейишди ва тунги клубга олиб боришди. У ерда қўшиқ қўйиб, ўйинлар ташкил қилардим. Тез орада у ердаги муҳитга мослашиб кетдим. Умуман уйга келмайдиган, тунги клубда яшайдиган бўлиб қолдим. Мактабга умуман бормай қўйганимдан кейин ўқитувчиларим онам билан боғланишган. Аммо пул топишга қизиқиб қолганим учун уларнинг гапига эътибор ҳам бермадик. Шундан кейин мени Вояга етмаганларга ижтимоий ҳуқуқий ёрдам кўрсатиш марказларига жойлаштиришди, — дейди маҳкум.
Ажрашиб, фарзандига умуман эътибор бермай қўйган ота ва ишлаш учун Россияга кетган она. Назоратсиз қолган ва ахлоқсиз инсонлар билан дўст тутинган суҳбатдошимиз ўзи ўқийдиган мактаб маъмурияти сабаб бир неча бор Вояга етмаганларга ижтимоий ҳуқуқий ёрдам кўрсатиш марказларига жойлаштирилган. Афсуски, 3 ёшдан 18 ёшгача бўлган назоратсиз, ахлоқсиз ва жабр кўрган болаларга ижтимоий ҳуқуқий ёрдам бериш марказидаги таълим-тарбия унга кор қилмади.
— Марказга тўрт марта жойлаштирилганман. Охирги борганимда у ерда олтита жиноий шерикларим билан танишганман. Бир-биримиз билан яқиндан танишганимиздан кейин марказга яна битта болани келтиришган. Бир кун кўникиш бўлимида сақланганидан кейин, бизнинг ёнимизга олиб чиқишган. Унга шунчаки бу ерда ким хўжайин эканлигини, зўрлигимизни кўрсатиб қўймоқчи бўлганмиз. Бир жиноий шеригим унга тазйиқ ўтказиб, унга қўл кўтарди.
Шу орада иккита шеригимизни текширув учун касалхонага олиб кетишди. Улар қайтганида зўравон шеригимиз янги келган болага лезвия билан таҳдид қилиб, касалхонадан қайтганларга “Сенларни онадан сўкди”, деб ёлғон гапирди. Янги келган бола ҳам қўрққанидан айбдор эканлигини айтди, шундан кейин дўппослаш зўрайиб кетди. Уни бир кун давомида дўппосладик. Кечки соат 19:00 га яқин бола ўзини йўқотиб, ҳушсиз аҳволга келди.
Марказга 48 соатлик ва бир ойлик муддатга болалар юбориларди. Ходимлар 48 соатлик муддати тугаган 25 нафар болани ота-онасига топшириш билан банд бўлишганидан фойдаланганмиз. Шунинг учун дўппослаётганимизни ҳеч ким сезмаган.
Кечки соат саккизларда оғир аҳволда уни касалхонага олиб кетишган. Орадан 15 дақиқа ўтиб, “Ўлди, йўлда жони узилибди”, деган хабар келди. Аввалига айбимизни тан олмаганмиз, аммо экспертиза ходимлари исботлаб беришганидан кейин ҳаммасини рўй-рост айтиб берганмиз, — дейди маҳкум.
Бир инсон ўлимига сабабчи бўлиш... Агар бу ишни ҳали вояга етмаган болакайлар содир этса, қанчалар қўрқинчли. Кичик жуссаси, ҳали гапни гапга улаб эркин гапиролмайдиган боланинг қўлидан шундай қабиҳлик келишига ишонгингиз келмайди. Афсуски, катталарнинг бепарволиги сабаб улар анча эрта улғайишган. Энг ёмони эса улар сабаб бир инсон фарзандидан айрилди. Она-ку, ишлаш учун хорижга кетди, ота-чи? Нега фарзанди ҳақида қайғурмади?
— Дадамнинг бошқа оиласи бор, у ерга бориб ортиқча бўлиб яшашни хоҳламадим. Аввал дадам билан у қадар яқин бўлмаганмиз, деярли умуман гаплашмасдик. Суд жараёнларида онам Россияда бўлгани учун у қонуний вакилим бўлди. Ўша вақтда анча яқинлашдик, гаплашдик. Онам ҳалигача қайтгани йўқ, ҳатто судимга ҳам келолмади. Чунки ўша вақтлари чипта нархлари анча баланд эди.
Қилган ишимдан пушаймонман, шунчаки кўнгилхушлик учун бесабаб бир инсоннинг ўлимига сабабчи бўлиб қолдик. Бундан афсусланаман. Кайф-сафога берилганимдан, катталарнинг айтганини қилмай, енгил ҳаётни танлаб хато қилганимни англадим, — дейди маҳкум.
Видеони тўлиқ ҳолда томоша қилинг.
Изоҳ (0)