“Надомат” лойиҳасининг навбатдаги суҳбатдоши Фарғона вилоятида дунёга келган. Оиланинг кенжа фарзанди бўлган йигит ҳеч қандай қийинчиликсиз улғайган. Афсуски, ота-онаси болани еб-ичиришдан ташқари, тарбия бериш ҳам кераклигини унутдими ёки кенжа фарзанд деб эркалади, хуллас 13-14 ёшдан бошлаб унинг қадам олиши ўзгарди. Ҳаммаси мактабга бормаслик ва кўчада беҳуда вақт ўтказишдан бошланди. Икки йил ичида бола ўғрилик қилишга, энг ёмони умр заволи бўлган гиёҳванд ва психотроп моддалар истеъмол қилиш даражасига етди.
Маҳкум — 17 ёшда, у Жиноят кодексининг 169-моддаси 3-қисми билан уч йилга озодликдан маҳрум этилган.
У 16 ёшдан жиноий шериклари билан ўғрилик қилишни бошлаган. Бундан ташқари, психотроп ва гиёҳванд моддаларни истеъмол қилган.
— Дадам ҳайдовчилик қиларди, онам эса уй бекаси. Оилада учта фарзандмиз, мен кенжасиман. Эркатой ва иш қилишни ёқтирмайдиган бола эдим. Ўртоқларим билан кўчада юришни яхши кўрардим. Кечаси кўчага чиқиб, анча вақтгача гаплашиб ўтирардик. Бир куни “Юр, айланиб келамиз”, дейишди. Ўшанда вақт анча кеч эди. У ўртоқларим мендан бир неча ёш катта, машина ҳайдашни билишарди. Соат 23:00 да Фарғонанинг Ўзбекистон туманига борганмиз. “Нега бу ерга келдик?” деб сўраганман. Чунки у ерга нима мақсадда борганимизни билмасдим. Кейин билсам, у ерга ўғирликка борган эканмиз. Notebook’ни ўғирладик ва эртаси куни уни 800 минг сўмга пулладик. Ўша пулдан менга 300 минг сўм улуш беришди. Орадан 2-3 ойча вақт ўтиб, тергов ишлари бошланди, билсам мен кузатув камерасига тушиб қолган эканман. Аввалига 10-сонли тергов ҳибсхонасига олиб боришди, кейин Тарбия колониясига олиб келишди, — дейди маҳкум.
Суҳбат аввалида маҳкум биринчи ўғриликдаёқ қўлга тушганини ва шериклари қамалмай, фақатгина у озодликдан маҳрум этилгани ҳақида гапирди. Аммо кўп ўтмай бу илк ўғрилик бўлмаганини тан олди.
— Noutbook биринчи ўғрилик бўлмаган. Ундан аввал кабел аппаратлари ва телефонларни ҳам ўғирлаганмиз. Бу ишни қилишимга психотроп таблеткаларни истеъмол қилишим сабаб бўлган. Ўғрилик қилаётганда таблетка таъсирида бўлардим, нима қилаётганимни билмасдим, — дейди маҳкум.
Суҳбат давомида психотроп таблеткаларни истеъмол қилишни унга ким ўргатгани ва қаердан сотиб олганига ҳам қизиқдик.
— Ўртоқларим чекишарди, улардан кўриб ўрганганман. Таблеткани ичардик, баъзан бурнимизга сепиб кайф қилардик. Ўғирлик қилиб топган пулимизга таблетка олардик ва чеккароқ, одамлардан ҳоли жойга бориб истеъмол қилардик. Уни чеккандан кейин нима қилаётганимизни билмай қолардик. Уни ҳар куни истеъмол қилардим, кайфим тарқагунча кўчада айланиб юрардим. Шунинг учун анча вақтгача уйдагиларим таблетка истеъмол қилаётганимни билмаган. Бир куни ўзимни билмай, уйга кириб келганман. Ўшанда кўзларим қизариб кетганидан ота-онам таблетка ҳақида билиб қолишган. Акам роса урган, қайтиб бу ишни қилмасликни тайинлаган. Ўртоқларимга қўшилмаслигим учун бир ойга яқин уйдан кўчага чиқаришмаган. Қочиб кетаверганимдан кейин оёғимдан занжирлаб, боғлаб қўйишганди. Аммо хумор тутганда занжирни узиб ҳам қочиб кетганман, — дейди маҳкум.
Маҳкумга нисбатан тўртта ҳолат бўйича жиноий иш қўзғатилган. У ҳозирда икки эпизод бўйича (169-моддаси 3-қисми) уч йилга озодликдан маҳрум этилгани ва яна икки ҳолат бўйича тергов жараёнлари давом этаётгани ҳақида гапирди.
— 16 ёшдан ўғрилик қилишни бошлаганман. Ҳозир иккита эпизод (ўғирлик бўйича) жазо муддатимни ўтаяпман. Яна иккита эпизод бўйича тергов жараёнлари давом этяпти. Суд қарорига кўра, жазо муддатим яна кўпайиши мумкин, — дейди маҳкум.
17 ёшида озодликдан маҳрум этилиб, ўғри ва гиёҳванд дея таърифланаётган маҳкумнинг ота-онаси тарбияда қандай хатога йўл қўйди?
— Ака-опамнинг тарбияси яхши, улар институтда ўқишган. Мен жуда эрка бўлганман. Кунига 50 минг сўмдан пул беришарди. Ҳар доим яхши еб-ичишимни исташарди. Хатом шуки, ўзимдан катта болаларга қўшилиб қолдим. Улар психотроп таблеткалар сотиладиган дорихоналарни кўрсатишди, пулим йўқлигида эса ўғриликка ўргатишди. Агар вақт ортга қайтганида, бундай қилмасдим. Аммо энди кеч, — дейди маҳкум.
Видеони тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)